აშშ-ის პრეზიდენტი დონალდ ტრამპი სოციალურ ქსელ Truth Social-ზე განცხადებას აქვეყნებს, სადაც ირანის ისლამური რესპუბლიკის წინააღმდეგ "ყველაზე დამანგრეველი ეკონომიკური ოპერაციის" დაწყებას ანონსებს. ტრამპის თქმით, თეირანმა ხელიდან გაუშვა შეთანხმების მიღწევის შანსი, რის გამოც უპრეცედენტო მასშტაბის ეკონომიკურ ომსა და სრულ იზოლაციას მიიღებს.

თეთრი სახლის ლიდერი ასევე აფრთხილებს ყველა იმ ქვეყანასა და სუბიექტს, რომლებიც ირანთან ეკონომიკურ თუ ლოჯისტიკურ თანამშრომლობას გააგრძელებენ, რომ მათაც უმკაცრესი ფინანსური შედეგები დაატყდებათ თავს.

"ირანის ისლამური რესპუბლიკისთვის შეთანხმების მისაღწევად იმაზე დიდი შესაძლებლობა არავისთვის მიუცია, ვიდრე მე მივეცი. ტრაგიკულია, რომ მათ ეს შანსი ვერ გამოიყენეს. ამიტომ, დღეს ვაცხადებ ყველაზე დამანგრეველ ეკონომიკურ ოპერაციას, რაც კი ოდესმე რომელიმე ქვეყნის წინააღმდეგ განხორციელებულა! ეს იქნება უპრეცედენტო მასშტაბის ეკონომიკური ომი და იზოლაცია. მათი სამხედრო-ზღვაო ძალები განადგურებულია, სამხედრო-საჰაერო ძალები — მოსპობილი, მათი სამხედრო ქარხნები — ნანგრევებად ქცეული, მათ ვალუტას ფასი არ აქვს და მათი ქვეყანა ბეწვზე კიდია. დღეს ასევე ვაცხადებ, რომ ნებისმიერი ქვეყანა, რომელიც თავის საფინანსო ინსტიტუტებს, ბიზნესებს, აეროპორტებსა თუ სახელმწიფო უწყებებს უფლებას მისცემს, ირანს რაიმე სახის სასიცოცხლო დახმარება გაუწიონ, თავად წააწყდება უზარმაზარ ეკონომიკურ შედეგებს. ნავთობის კონტრაბანდა, სვოპ-ხაზები, ფულადი გზავნილები, სავალუტო ჯიხურები, გემების რეგისტრაცია, ფიქტიური კომპანიები — ეს ყველაფერი ახლავე უნდა შეწყდეს. თქვენ იცით, ვინც ხართ. ეს იქნება ეკონომიკური "დღე" (D-Day) და ჩვენ გვჭირდება, რომ ყველა ჩვენი მოკავშირე ამერიკის შეერთებული შტატების გვერდით დადგეს ირანის საფრთხის იზოლირებისა და დამარცხებისთვის. ეს მანიაკები მიჯაჭვულნი არიან კუთხეში და ეს ისტორიული ზომები მათ დაანგრევს, ისევე როგორც მათ უნარს, მთელ მსოფლიოში დათესონ ტერორი. ირანს არასდროს ექნება ბირთვული იარაღი", — წერს ტრამპი.