რუსეთის საგარეო საქმეთა სამინისტროს ოფიციალური წარმომადგენელი მარია ზახაროვა იმედოვნებს, რომ თბილისი მიიღებს ამომწურავ ზომებს საქართველოში რუსოფობიის აღსაკვეთად და სრულად უზრუნველყოფს ქვეყანაში ჩამოსული რუსეთის მოქალაქეების უსაფრთხოებას. მისი თქმით, "ანტირუსული გამოვლინებები საფუძვლიანად უნდა იქნეს გამოძიებული, ხოლო დამნაშავეები — პასუხისგებაში მიცემული".

"ბოლო პერიოდში საქართველოში რუსეთის მოქალაქეებთან დაკავშირებით რამდენიმე სერიოზულ ინციდენტსაც ჰქონდა ადგილი, რაც, რა თქმა უნდა, საქართველოს ხელისუფლების მხრიდან განსაკუთრებულ ყურადღებასა და შესაბამის რეაგირებას მოითხოვს.

გავითვალისწინეთ თქვენ მიერ ნახსენები საქართველოს ხელისუფლების წარმომადგენელთა განცხადებები. ვიმედოვნებთ, რომ თბილისი მიიღებს ამომწურავ ზომებს რუსოფობიის აღსაკვეთად და სრულად უზრუნველყოფს საქართველოში ჩამოსული რუსეთის ყველა მოქალაქის უსაფრთხოებას. ანტირუსული გამოვლინებები საფუძვლიანად უნდა იქნეს გამოძიებული, ხოლო დამნაშავეები — პასუხისგებაში მიცემული.

კიდევ ერთხელ მინდა ხაზი გავუსვა: ჩვენთვის უპირობო პრიორიტეტად რჩება ჩვენი მოქალაქეების უსაფრთხოება, რომლებიც საქართველოში როგორც ტურისტული, ისე საქმიანი მიზნებით ჩადიან. ვფიქრობ, ნებისმიერი სახელმწიფო თავისი მოქალაქეების მიმართ სწორედ ამ პოზიციით უნდა ხელმძღვანელობდეს", — თქვა ზახაროვამ.

რაც შეეხება რუსეთთან დიპლომატიური ურთიერთობების აღდგენასთან დაკავშირებით დასმულ კითხვას, ზახაროვამ ამ ურთიერთობების გაწყვეტას საქართველოს მხრიდან გადადგმული "დანაშაულებრივი შეცდომა" უწოდა. მან დაამატა, რომ "დიპლომატიური ურთიერთობების აღდგენის ინიციატივა საქართველოდან უნდა მოდიოდეს, ისინი ასეთი შესაძლებლობისთვის მზად არიან".

"შეგახსენებთ, რომ რუსეთსა და საქართველოს შორის დიპლომატიური ურთიერთობების არარსებობაც ზემოხსენებული "ხალხის მსახურის", სააკაშვილის, ტრაგიკული მემკვიდრეობის ნაწილია. ამიტომ ჩვენი ურთიერთობების გაწყვეტის გადაწყვეტილება უბრალოდ შეცდომა არ ყოფილა. ეს იყო შეცდომა, რომელიც, მართლაც, დანაშაულზე უარესია. ეს დანაშაულებრივი შეცდომა იყო.

ამ ვითარებაში თბილისზე საუბარი, როცა საქართველოს ხალხს ვგულისხმობთ, უბრალოდ შეუსაბამოა. მ. ნ. სააკაშვილმა გადადგა ეს ნაბიჯი, თუმცა ის ქვეყნის პრეზიდენტი იყო. შესაბამისად, დიპლომატიური ურთიერთობების აღდგენის ინიციატივა საქართველოდან უნდა მოდიოდეს. ჩვენ არაერთხელ გვითქვამს, რომ ასეთი შესაძლებლობისთვის მზად ვართ, თუმცა ამ ეტაპზე ეს საკითხი დღის წესრიგში არ დგას", — თქვა ზახაროვამ.