ოპოზიციონერი პოლიტიკოსი დავით ზურაბიშვილი ბოლო პერიოდში ექსპრემიერ ირაკლი ღარიბაშვილის მიერ ციხიდან გამოგზავნილ წერილებს ეხმაურება და აცხადებს, რომ "ირაკლი ღარიბაშვილს ტყუილად აქვს იმედი, რომ ბიძინა ივანიშვილს ასე მოუბრუნებს გულს. პოლიტიკოსი ვარაუდობს, რომ ამ პროცესებს კობახიძეც შეეწირება, ღარიბაშვილის რეაბილიტაცია კი არ მოხდება.

"არ იქნება ეს ბიძინა ივანიშვილისთვის სასიამოვნო... ყველაფერი ეს ცუდია მისთვის. ჯერ ერთი, მისი ყოვლისშემძლეობის მითს რაღაცნაირად ჩრდილს აყენებს, იმიტომ რომ უწესრიგობა აქვს, შიგნით ვერ მოუგვარებია საქმე, მეორეც ერთი, ეს, რა თქმა უნდა, ირაკლი ღარიბაშვილს ტყუილად აქვს იმედი, რომ ბიძინა ივანიშვილს ასე მოუბრუნებს გულს. პირიქით, უფრო გაბრაზდება, ასეთ დღეში რომ ჩააგდო. მეორეს მხრივ, ბიძინა ივანიშვილი გაბრაზდება კობახიძეზეც, იმიტომ რომ მან ეს საკითხი ვერ მოაგვარა და ვერ გააკეთა ისე, რომ წყნარად ყოფილიყო და ჩუმად და არ აეტეხათ ამხელა ამბავი. ასე რომ, მაინცდამაინც სასიამოვნო ეს არცერთი გარემოცვის წევრისთვის არ არის ეს ამბავი. საბოლოო ჯამში, ვფიქრობ, ამას კობახიძეც შეეწირება, ღარიბაშვილის რეაბილიტაცია არ მოხდება. ბიძინა ივანიშვილისთვის ეს არის ყველაზე სწორი გადაწყვეტა", — ამბობს ზურაბიშვილი ტვ პირველთან.

შეგახსენებთ, რომ წერილების სერია ექსპრემიერმა 18 აგვისტოდან დაიწყო. პირველ წერილში ღარიბაშვილმა საკუთარ და ოჯახის უსაფრთხოებაზე პასუხისმგებლობა ბიძინა ივანიშვილს და ხელისუფლებას დააკისრა. ამას მოჰყვა მეორე წერილი, რომელიც 19 აგვისტოს გამოქვეყნდა. რიგით მესამე წერილი გუშინ, 20 აგვისტოს გასაჯაროვდა. ბოლო წერილში ექსპრემიერი წერს, რომ ტყუილად წვალობენ მისგან "ქვეყნის, გუნდისა და ბიძინა ივანიშვილის მოღალატე წარმოაჩინონ. ის "ბილწთ არ შეეკვრება ზავითა".

რა წერია ირაკლი ღარიბაშვილის წერილებში წაიკითხეთ აქ: