საქართველოს მოქალაქეების ანტიანექსიური პლატფორმა შეიქმნა, რომლის მიზანი საქართველოს ტერიტორიული მთლიანობისა და სუვერენიტეტის მხარდაჭერაა.

საქართველოს მოქალაქეთა ანტიანექსიური პლატფორმის დამფუძნებლები არიან: ვლადიმერ ჩაჩიბაია, ნოდარ ხარშილაძე, აკია ბარბაქაძე, კახა გოგიძე, პაატა დავითაია, ნიკოლოზ ვაშაკიძე, მამუკა გამყრელიძე, გიორგი მელაშვილი და ირაკლი ტაბლიაშვილი.

პლატფორმის მიზნები საზოგადოებას, მისმა ერთ-ერთმა დამფუძნებელმა, პაატა დავითაიამ გააცნო.

"საქართველოს ტერიტორიის წინაშე არსებული საფრთხეების მომატების გამო, ჩვენ, საქართველოს მოქალაქეები, რომლებიც ვერთიანდებით, როგორც ზეპარტიული გაერთიანება და რომელთათვის საქართველოს სუვერენიტეტი, ტერიტორიული მთლიანობა, საერთაშორისო სამართლის პრინციპები, თავისუფლება და ადამიანის ღირსება წარმოადგენს უმთავრეს ფასეულობას, ვაცხადებთ საქართველოს მოქალაქეთა ანტიანექსიური პლატფორმის შექმნას.

ჩვენ გავერთიანდით მტკიცე რწმენით, რომ რუსეთის ფედერაციის მიერ ნებისმიერი ფორმით განხორციელებული ოკუპაცია, აფხაზეთისა და ცხინვალის რეგიონების ფაქტობრივი ანექსია, ჰიბრიდული საფრთხეები, სეპარატიზმის წახალისება და ოკუპირებულ რეგიონებში დემოგრაფიული ცვლილებების ძალადობრივი გზით განხორციელება წარმოადგენს საერთაშორისო სამართლისა და ადამიანის ფუნდამენტური უფლებების უხეშ დარღვევას.

პლატფორმის მიზნებია:

საქართველოს ტერიტორიული მთლიანობისა და სუვერენიტეტის მხარდაჭერა საერთაშორისო სამართლის საყოველთაოდ აღიარებული ნორმებისა და პრინციპების საფუძველზე;

რუსეთის ფედერაციის მხრიდან მომდინარე ოკუპაციისა და ფაქტობრივი ანექსიისა, ისევე როგორც ოკუპირებული რეგიონების ეგრეთ წოდებული დამოუკიდებლობის არ აღიარების პრინციპების განმტკიცება და საქართველოს ტერიტორიების ძალის გამოყენებით მიტაცების სამართლებრივი შეფასების ხელშეწყობა;

ოკუპირებულ რეგიონებში მარიონეტული რეჟიმებისა და მათი ლიდერების, აგრეთვე ანექსიური პროცესების ხელშემწყობი პირების მიმართ საერთაშორისო სისხლის სამართლის დევნის ინიცირება;

საზოგადოებრივი ცნობიერების ამაღლება რუსული ჰიბრიდული და ანექსიური საფრთხეების შესახებ;

საქართველოს საერთაშორისო პარტნიორებთან და დიპლომატიურ კორპუსთან აქტიური თანამშრომლობა ანექსიის რისკებისა და ოკუპაციის საკითხებზე;

საერთაშორისო პარტნიორებთან, ანალიტიკურ ცენტრებთან, დიპლომატიურ მისიებთან სამუშაო შეხვედრებისა და კოორდინაციის უზრუნველყოფა;

რუსეთის მარიონეტული რეჟიმების ლიდერებისა და ანექსიის პროცესში ჩართული აქტორების მიმართ მიზნობრივი სანქციების დაწესების საკითხის მხარდაჭერა", — განაცხადა დავითაიამ.