კანიე ვესტი ოქტომბერში რუსეთში ორი მასშტაბური კონცერტის გამართვას გეგმავდა, თუმცა ახლა შოუების ბედი გაურკვეველია. სანქტ-პეტერბურგის Gazprom Arena-მ მოულოდნელად განაცხადა, რომ მუსიკოსის კონცერტები მათ სტადიონზე აღარ გაიმართება.

კანიე ვესტის კონცერტები 10 და 11 ოქტომბერს უნდა გამართულიყო, ბილეთები კი უკვე სრულადაა გაყიდული. თუ კონცერტები შედგებოდა, კანიე ვესტი უკრაინაში რუსეთის შეჭრის შემდეგ ქვეყანაში გამომსვლელი პირველი დასავლელი მეგავარსკვლავი გახდებოდა.

Gazprom Arena სანქტ-პეტერბურგში.

ფოტო: Gazprom

სტადიონის განცხადებით, კონცერტების ორგანიზატორებთან სტადიონის იჯარის შესახებ ხელშეკრულება ხელმოწერილი არ ყოფილა, რის გამოც ღონისძიებების ჩატარება შეუძლებელი გახდა. თუმცა, კონცერტების ორგანიზატორი კომპანია Say Agency სხვა ვერსიას ავრცელებს. მათი თქმით, Gazprom Arena-ს განცხადების შესახებ თავადაც მედიიდან გაიგეს და ამ ეტაპზე კანიე ვესტის კონცერტები ოფიციალურად გაუქმებული არ არის.

ორგანიზატორები ამბობენ, რომ კონცერტები სტადიონის ოფიციალური თანხმობის საფუძველზე დააანონსეს. მათი თქმით, ხელშეკრულება ჯერ არ გაფორმებულა, თუმცა ამისთვის განსაზღვრული ვადა ჯერ არ ამოწურულა. ახლა ისინი სტადიონთან დაკავშირებასა და პრობლემის გარკვევას ცდილობენ.

ფოტო: Getty Images

კანიე ვესტის რუსეთში გამოსვლას თავიდანვე არაერთგვაროვანი რეაქცია მოჰყვა. ბოლო წლებში მუსიკოსი ანტისემიტური განცხადებებისა და არაერთი სკანდალის გამო კრიტიკის ცენტრში აღმოჩნდა, რამაც რამდენიმე მსხვილ კომპანიასთან თანამშრომლობის შეწყვეტაც გამოიწვია.

წინააღმდეგობა თავად რუსეთშიც გაჩნდა. პოლიტიკოსმა ნიკოლაი ნოვიჩკოვმა ჰიტლერის შექების გამო მუსიკოსის წინააღმდეგ გამოძიების დაწყება მოითხოვა და განაცხადა, რომ კონცერტები უნდა გაუქმდეს, თუ მუსიკოსი საჯაროდ არ გამოხატავს მხარდაჭერას რუსეთისა და უკრაინაში მიმდინარე "სპეციალური სამხედრო ოპერაციის" მიმართ. კიდევ ერთმა რუსმა პოლიტიკოსმა, ვიტალი მილონოვმა კი განაცხადა, რომ კანიე ვესტს კონცერტებზე ტრადიციული რუსული სიმღერები უნდა შეესრულებინა.

კანიე ვესტმა იანვარში თავისი საქციელის გამო ბოდიში მოიხადა და განაცხადა, რომ არც ნაცისტია და არც ანტისემიტი. მიუხედავად სკანდალებისა, მას ბოლო პერიოდში კონცერტები აშშ-ში, თურქეთში, ნიდერლანდებში, საქართველოში, ალბანეთში, პორტუგალიასა და ყაზახეთში ჰქონდა. მუსიკოსის ტურნე მის მე-12 სოლო ალბომს, "Bully"-ს უკავშირდება, რომელიც მარტში გამოვიდა.

ამ დროისთვის უცნობია, იპოვის თუ არა Say Agency კანიე ვესტისთვის სხვა ადგილს სანქტ-პეტერბურგში, ან შეძლებენ თუ არა ორგანიზატორები Gazprom Arena-სთან არსებული უთანხმოების მოგვარებას. ოქტომბრამდე კანიე ვესტის რუსული კონცერტების ბედი კვლავ გაურკვეველია.

ასევე იხილეთ: