თბილისში, რუსთაველის გამზირზე მდებარე ხუთვარსკვლავიანი სასტუმრო "ბილტმორი" გაიყიდა. BM.GE-ის ინფორმაციით, აღნიშნულის შესახებ ცნობას სომეხი ბიზნესმენის, კარენ საფარიანის ჰოლდინგური კომპანია AGE S.A. ავრცელებს, რომელიც Arins Group-ის შემადგენლობაში შედის. სასტუმროს მფლობელები არაბეთის გაერთიანებული საამიროების სამეფო ოჯახის წევრები შეიხი ნაჰაიან მაბარაქ ალ ნაჰაიანი (66%-იანი წილით) და მისი პარტნიორები იყვნენ.

BM.GE-ის ცნობით, შპს "დაბი გრუპ ჯორჯია", რომელიც "ბილტმორს" ფლობს, რუსთაველის №29-ში განთავსებულ 9,121 კვ.მ მიწის ნაკვეთს, "იმელის" ისტორიულ შენობასა და 2016 წელს აშენებულ 36-სართულიან კოშკს მოიცავს. 216-ნომრიანი სასტუმრო კომპლექსის საერთო შემოსავალმა 2024 წელს 35.46 მილიონი ლარი შეადგინა (საიდანაც 29.4 მლნ ლარი სასტუმროს საქმიანობიდან, ხოლო 6.04 მლნ ლარი საინვესტიციო ქონებისა და კაზინოს ფართის გაქირავებიდან მიიღეს). თუმცა, მაღალი ფინანსური ხარჯების გამო, კომპანიამ გასული წელი 9.86 მილიონი ლარის წმინდა ზარალით დაასრულა.

სასტუმრო "ბილტმორთან" ერთად Arins Group შეიხ ნაჰაიანის საინვესტიციო ჰოლდინგისგან "ტერაბანკსაც" ყიდულობს. მხარეებს შორის შეთანხმება უკვე მიღწეულია, თუმცა საბანკო წილების გასხვისება საქართველოს ეროვნული ბანკის თანხმობას ელოდება.

Arins Group-ის განცხადებაში ნათქვამია, რომ ეს ნასყიდობა ჯგუფის საერთაშორისო გაფართოების სტრატეგიის მნიშვნელოვან ნაწილს წარმოადგენს:

"სს "ტერაბანკისა" და სასტუმრო "ბილტმორ თბილისის" შეძენის შესახებ შეთანხმება ჰოლდინგის სტრატეგიული განვითარების ნაწილია და მიზნად ისახავს საქმიანობის გაფართოებას ევროპულ და საერთაშორისო ბაზრებზე, მომსახურებების შემდგომ განვითარებასა და რეგიონული ეკონომიკური კავშირების გაღრმავებას.

რეგიონული გაფართოების ფარგლებში ერთ-ერთ პრიორიტეტულ ბაზრად საქართველო შეირჩა, ქვეყნის ეკონომიკური ზრდის ძლიერი დინამიკის, მდგრადი და დაბალანსებული მაკროეკონომიკური პოლიტიკისა და ფინანსური სექტორის ეფექტიანი ფუნქციონირების გათვალისწინებით. მზარდი კომპანიისთვის მეზობელ ქვეყანაში გაფართოება განვითარებისკენ გადადგმული ლოგიკური ნაბიჯია.

სს "ტერაბანკის" შეძენა მნიშვნელოვან შესაძლებლობებს შექმნის საქართველოში მცირე და საშუალო ბიზნესის მხარდაჭერის გაძლიერების, კორპორაციული საბანკო მომსახურებების გაფართოებისა და საცალო საბანკო მიმართულების შემდგომი განვითარებისათვის.

ხუთვარსკვლავიანი სასტუმრო "ბილტმორ თბილისი", რომელიც თბილისის ერთ-ერთ გამორჩეულ შენობად მიიჩნევა, ჰოლდინგისთვის ტურიზმის სექტორში სტრატეგიულ ინვესტიციას წარმოადგენს. აღნიშნული ინვესტიცია ხაზს უსვამს AGE S.A.-ის გრძელვადიან ინტერესს საქართველოს მიმართ და ქვეყნის ეკონომიკური განვითარების მხარდაჭერის მზაობას.

ტრანზაქციის დასრულება ექვემდებარება შესაბამისი მარეგულირებელი ორგანოების თანხმობის მიღებასა და კანონმდებლობით გათვალისწინებული სხვა აუცილებელი პროცედურების დასრულებას,"— ნათქვამია განცხადებაში.