2 წლის წინ გარდაცვლილი 23 წლის სტიქაროსნის, თემო ხადურის დედა ნინო გვიშიანი თავისი შვილის საქმის გამოძიებას და დამნაშავე პოლიციელების დასჯას ითხოვს. ქალი ამბობს, რომ შვილი სწორედ პოლიციელებმა მოუკლეს.

ის დღეს ქუთაისის რაიონულ პროკურატურასთან გულშემატკივრებთან ერთად მივიდა და გენერალურ პროკურორს, გიორგი გვარაკიძეს მოსთხოვა, ბოლომდე მიიყვანოს მისი შვილის მკვლელობის საქმე.

"ორი წელია ჩემი ოჯახისთვის არა და არ დადგა სამართალი. გუშინ გავეცანით სამედიცინო ექსპერტიზას, კომისიურს, გამოვაქვეყნე და ნახეთ ალბათ, როგორი გამეტებული ჰყავთ ჩემი სიმწრით ნაზარდი და ნალოლიავები შვილები. დღეს ორი წელი გახდა ჩემი ოჯახის ამ ტრაგედიიდან. მე მოგმართავთ ყველას — გელოდებით არა საფლავზე, არამედ პროკურატურასთან. 12:00 საათზე ერთად დავიტიროთ ჩემი შვილის ნატანჯი სხეული და ერთად მივაწვდინოთ ხმა ხელისუფლებას. პასუხისგებაში მიეცეს ყველა ის პოლიციელი, ვინც ამ საქმეში ურევია. სიკვდილამდე, ბოლომდე ჩავყვები. არ გავჩერდები შენთვის შვილო", – ამბობს 2 წლის წინ გარდაცვლილი 23 წლის სტიქაროსნის, თემო ხადურის დედა ნინო გვიშიანი ვიდეომიმართვაში.

მანამდე, 24 აგვისტოს, გარდაცვლილის ოჯახს სამედიცინო კომისიური ექსპერტიზის დასკვნა გადაეცა. დოკუმენტის თანახმად, გარდაცვალების ზუსტი მიზეზისა და დროის დადგენა "გვამის მკვეთრად გამოხატული ლპობითი ცვლილებების გამო" ვერ მოხერხდა. დოკუმენტში ასევე აღნიშნულია, რომ ახალგაზრდას სიცოცხლეში მიყენებული დაზიანებები — ორივე თვალბუდისა და ქუთუთოების მიდამოებში ბლაგვი საგნით მიყენებული სისხლნაჟღენთები აღენიშნებოდა.

ფოტო: სამედიცინო ექსპერტიზის დასკვნას გარდაცვლილის დედა აქვეყნებს

"დღეს პროკურატურაში გავეცანით სამედიცინო ექსპერტიზას, ამჯერად კომისიურს, რაც იდენტურია და არაფერი სიახლის მომცემი! (რასაც აქამდე ველოდებოდით და თან დროს გვიწელავდნენ).

გარდაცვალება ვერ დადგინდა. რატომ? იმიტომ რომ ასე აწყობთ! კვალი გააქრეს! საქმე გამოძიებულია! დარჩა მოქმედება! ბოლომდე უნდა გავიდეთ. უკანდასახევი გზა არ არსებობს!
ამაზე მოგვიანებით გავაკეთებ ვიდეომიმართვას... ნაცემია ხალხო ჩემი შვილი სიკვდილამდე!!!

მოგიკვდეს დედა. მიწიდან ამოგთხრით დამელოდეთ", — დაწერა გარდაცვლილის დედამ, ნინო გვიშიანმა და სამედიცინო კომისიური ექსპერტიზა გამოაქვეყნა.

ტრაგედია 2024 წელს მოხდა — თბილისიდან ქუთაისისკენ მიმავალ თემო ხადურს, ოჯახის ცნობით, პოლიცია აედევნა, რის შემდეგაც იგი გაუჩინარდა. სამი დღის შემდეგ ბიჭის ცხედარი მდინარე წაჩხურაში მწყემსმა იპოვა.