ენდრიუ გარფილდმა გასული წელი რამდენიმე პროექტზე გადაბმულად მუშაობაში გაატარა. მათ შორის იყო ენიდ ბლიტონის წიგნის ახალი ეკრანიზაცია The Magic Faraway Tree, ისტორიული ექშენ-დრამა The Uprising და ლუკა გუადანინოს ბიოგრაფიული ფილმი სემ ალტმანზე — Artificial.

ამ დატვირთული წლის ფონზე, 43 წლის მსახიობს ახალ ინტერვიუში ჰკითხეს, უფიქრია თუ არა საჯარო კარიერის მიტოვებაზე.

მუდამ ვფიქრობ, — აღიარა გარფილდმა.

"წელს ძალიან ბევრი ვიმუშავე. დაახლოებით 11-12 თვე გადაბმულად, პროექტიდან პროექტზე გადავდიოდი. მინდა, რომ ხალხმა ეს ნამუშევრები ნახოს, ამიტომ მათ შესახებ მოყოლაც მომიწევს, ეს მესმის. მაგრამ ჩემს ნებაზე რომ იყოს, ხალხი უბრალოდ ნახავდა ამ ფილმებს, მე კი სომერსეტის სოფელში წავიდოდი, ხეზე კვეთით დავკავდებოდი და ვიფიქრებდი იმაზე, თუ რას აკეთებენ ჩიტები", — ამბობს მსახიობი.

The Magic Faraway Tree

The Magic Faraway Tree

ფოტო: Deadline

ინტერვიუს დასაწყისში გარფილდმა კარიერული ოცნებების ასრულებაზეც ისაუბრა: "ოცნებები კვლავ მაქვს, თუმცა მიღწევებზე მეტად, ალბათ უფრო ფილოსოფიური და ეგზისტენციალური. ახლა ჩემი მიზნები ოჯახთან, მეგობრებთან და საკუთარ თავთან ურთიერთობას უკავშირდება".

ეს პირველი შემთხვევა არაა, როცა ენდრიუ საჯარო სივრციდან წასვლაზე საუბრობს. ჯერ კიდევ 2022 წელს, 3 მასშტაბურ ფილმში მონაწილეობის შემდეგ, გარფილდმა განაცხადა, რომ კარიერაში პაუზას იღებდა — "ძალების აღდგენა და იმაზე დაფიქრება მჭირდება, თუ რა მინდა გავაკეთო ან ვინ მინდა ვიყო. ცოტა ხნით მსურს ჩვეულებრივი ადამიანი გავხდე".

ფოტო: Teen Vogue

ეს პაუზა დაახლოებით 2 წელი გაგრძელდა, 2024 წლის რომანტიკულ დრამაში We Live in Time კი ენდრიუ მთავარი როლით დაბრუნდა.