განათლების, მეცნიერებისა და ახალგაზრდობის მინისტრმა, გივი მიქანაძემ ჟურნალისტებთან საუბრისას განაცხადა, რომ თუ მშობლებს მიზანმიმართულად არ სურთ თავიანთ შვილებს სასკოლო ფორმები ჩააცვან, "სკოლაში იწარმოებს აღმზრდელობითი კომპონენტი და სკოლის დისციპლინურ კომისიას მშობელთან ექნება არაერთგზის გასაუბრება ამ საკითხთან დაკავშირებით".

მისივე განმარტებით, კონკრეტულად რა ზომებს მიიღებენ იმ ბავშვებთან დაკავშირებით, რომლებიც ფორმების გარეშე გამოცხადდებიან, სკოლის გადასაწყვეტია.

"თუ ეს არის მიზანმიმართული… ნაბიჯი, რომ აი, "მე არ მინდა და არ ჩავაცმევ ჩემს შვილს ფორმას", რა თქმა უნდა, ამ შემთხვევაში, იმ სკოლაში იწარმოებს აღმზრდელობითი კომპონენტი და მშობელთან იქნება არაერთგზის გასაუბრება ამ საკითხთან დაკავშირებით.

[...] სკოლაში არის შექმნილი დისციპლინური კომისია და ეს არის მათ პრეროგატივა და გადასაწყვეტი. შინაგანაწესის დარღვევიდან — არაერთგზის დარღვევიდან — რა გადაწყვეტილებას მიიღებენ, ამას უკვე თვითონ სკოლა განსაზღვრავს, იმიტომ რომ თითოეული სკოლა არის საჯარო სამართლის იურიდიული პირი და, შესაბამისად, სკოლა განსაზღვრავს კონკრეტულად რა დისციპლინური ზომები შეიძლება იქნას გამოყენებული. თქვენი მიზანი მესმის, რომ გინდათ, რომ რაღაცნაირად ეს ყველაფერი მძიმედ და უხეშად წარმოაჩინოთ…

[...] ჩვენი მიზანია არა ის, რომ ბავშვი არ დავუშვათ სკოლაში, არამედ ბავშვი სკოლაში იყოს, მაგრამ დაემორჩილოს იმ სტანდარტებს და საერთო პრაქტიკას, რომელიც სკოლის შინაგანაწესით არის დადგენილი", — განაცხადა მიქანაძემ (მის კომენტარს"ტვ პირველი" ავრცელებს).

კითხვაზე შეიძლება თუ არა რომ დირექტორმა შინაგანაწესის ცვლილებით, საგაკვეთილო პროცესზე დასწრება აუკრძალოს მოსწავლეს, რომელიც ფორმის გარეშე გამოცხადდება, მიქანაძემ უპასუხა, რომ ეს არ არის მიზანი. მისივე თქმით მიზანია, რომ მშობელმა მიიღოს ის პროცესი, რაც შინაგანაწესითაა დადგენილი.

"კიდევ ერთხელ ვამბობ: ეს არ არის მიზანი. მიზანი არის, რომ მშობელმა მიიღოს ის პროცესი, რაც შინაგანაწესით არის დადგენილი. ფორმა უნდა ეცვას ყველას", — განაცხადა მიქანაძემ.