ოკუპირებული ცხინვალის ე.წ. ცენტრალურმა საარჩევნო კომისიამ პრეზიდენტობის კანდიდატების რეგისტრაციის პროცედურა დაასრულა.

"ხუთივე პრეტენდენტის მიერ წარმოდგენილი დოკუმენტების განხილვის შედეგად, 2026 წლის 18 სექტემბერს დანიშნულ ვადამდელ საპრეზიდენტო არჩევნებზე საარჩევნო ბიულეტენში ოთხი კანდიდატი იქნება წარმოდგენილი", — განაცხადეს ე.წ. ცენტრალურ საარჩევნო კომისიაში.

გადაწყვეტილებები ცესკოს სხდომებზე 16, 20 და 22 აგვისტოს მიიღეს.

რეგისტრირებული კანდიდატები არიან:

მარატ კამბოლოვი, დაბადებული 1965 წელს — წარდგენილია ამომრჩეველთა საინიციატივო ჯგუფის მიერ. რეგისტრაციის გადაწყვეტილება 2026 წლის 16 აგვისტოს მიიღეს.

ზურაბ კოკოევი, დაბადებული 1960 წელს — წარდგენილია პოლიტიკური პარტია ერთობის მიერ. რეგისტრაციის გადაწყვეტილება 2026 წლის 20 აგვისტოს მიიღეს.

მურატ ვალიევი, დაბადებული 1989 წელს — წარდგენილია ალანიის პატრიოტთა რესპუბლიკური პოლიტიკური პარტიის მიერ. რეგისტრაციის გადაწყვეტილება 2026 წლის 22 აგვისტოს მიიღეს.

ყაზბეკ კოდოევი, დაბადებული 1974 წელს — წარდგენილია ამომრჩეველთა საინიციატივო ჯგუფის მიერ. რეგისტრაციის გადაწყვეტილება 2026 წლის 22 აგვისტოს მიიღეს.
რეგისტრაციაზე უარი ეთქვა

ხოხ ჩოჩიევს, დაბადებული 1990 წელს, რომელიც პოლიტიკურმა პარტია ირ ფარნმა წარადგინა.

"ცესკოს 20 აგვისტოს დადგენილებით, მას რეგისტრაციაზე უარი ეთქვა. გადაწყვეტილების საფუძველი გახდა ის, რომ წარმოდგენილი დოკუმენტები და ხელმოწერების ფურცლები კანონმდებლობით დადგენილ მოთხოვნებს არ აკმაყოფილებდა.

კერძოდ, ნამდვილი და სანდოდ დადასტურებული ხელმოწერების რაოდენობა კანონით განსაზღვრულ მინიმუმზე — 1 750 ხელმოწერაზე — ნაკლები აღმოჩნდა. ასევე არ იყო შესრულებული მოთხოვნა, რომლის მიხედვითაც ხუთივე ადმინისტრაციულ-ტერიტორიულ რაიონში მინიმუმ 150-150 ხელმოწერა უნდა შეგროვებულიყო. დარღვევა დაფიქსირდა ცხინვალის, ლენინგორისა და ჯავის რაიონებში", — განმარტეს ე.წ. ცენტრალურ საარჩევნო კომისია.

22 აგვისტოს სხდომაზე ოკუპირებული ცხინვალი ე.წ. ცესკომ ასევე დაამტკიცა ე.წ. პრეზიდენტის ვადამდელი არჩევნებისთვის დასაბეჭდი საარჩევნო ბიულეტენების რაოდენობა. საარჩევნო ბიულეტენების ტირაჟი 40 000 ეგზემპლარით განისაზღვრა. აღნიშნული რაოდენობა ბოლო რამდენიმე საარჩევნო კამპანიის განმავლობაში უცვლელი რჩებოდა.