ყოფილ პრემიერმინისტრს, ირაკლი ღარიბაშვილს ექსმინისტრ ჯუანშერ ბურჭულაძის საქმეზე, ქრთამის სახით 750 000 ლარის აღების ფაქტზე, ახალი ბრალი წარუდგინეს. დანაშაული 11-დან 15 წლამდე თავისუფლების აღკვეთას ითვალისწინებს.

ღარიბაშვილის ახალ ბრალს ყოფილი თანაგუნდელები გამოეხმაურნენ.

განათლების მინისტრ გივი მიქანაძეს აქვს განცდა, რომ ირაკლი ღარიბაშვილი წერილებით ცდილობდა ახალი ბრალდებები გადაეფარა.

"შეფასებისგან თავს შევიკავებ, თუმცა ბოლო დღეებში გარკვეული სპეკულაციური წერილები, რომელიც გავრცელდა და არაფრის მომცემი არ იყო, აშკარად იკვეთება, რომ მას ჰქონდა სწორედ ასეთი მოცემულობების გადაფარვის მცდელობა და სპეკულირება.
მე მაქვს განცდა, რომ სწორედ ამ წერილებით ის ცდილობდა ახალი ბრალდებები გარკვეულწილად გადაეფარა და სპეკულირება მოეხდინა. ეს არის რაც ჩანს, თუმცა გამოძიებას უნდა დაველოდოთ. ეს არის მთლიანად სამართალდამცავი ორგანოების კომპეტენცია", — განაცხადა მიქანაძემ.

ქართული ოცნების დეპუტატის, არჩილ გორდულაძის შეფასებით, ყოფილი პრემიერმინისტრის, ირაკლი ღარიბაშვილის მიერ გავრცელებული ურთიერთსაწინააღმდეგო წერილები საკუთარი დანაშაულის გადაფარვასა და პასუხისმგებლობისგან თავის არიდებას ემსახურება. დეპუტატის თქმით, ყოფილ პრემიერს უკანონო შემოსავლის მიღების გამო ბრალი მიმდინარე წლის იანვარში წარედგინა, ხოლო მძიმე კორუფციულ დანაშაულზე მიმდინარე გამოძიების ფონზე, სამართლებრივი პროცესის პოლიტიზებას ცდილობს. გორდულაძემ ხაზგასმით აღნიშნა, რომ განსაკუთრებით დიდი ოდენობის არადეკლარირებული თანხების მიღების აღიარების შემდეგ, ღარიბაშვილს პოლიტიკაში არაფერი ესაქმება, ხოლო საქმის პოლიტიკურ ჭრილში გადაყვანის მცდელობა კრახით დასრულდება.

"როგორც ჩანს, ირაკლი ღარიბაშვილის მხრიდან ეპისტოლარული მასკარადის დადგმის მცდელობა საკუთარი თავის დაცვის მცდელობა იყო. პოლიტიკაში ჩართულ ადამიანებს, თანამდებობის პირებს საკუთარი დანაშაულის გადასაფარად ხშირად სჩვევიათ ხოლმე პოლიტიკური ინსინუაციების წარმოება, რაც ვნახეთ კიდეც.

უმძიმესია, როცა საუბარი გვაქვს უმაღლეს თანამდებობის პირზე, ჩვენი გუნდის მაშინდელ ლიდერზე და პრემიერმინისტრზე, რომელიც როგორც აღმოჩნდა, კორუფციულ დანაშაულში პირდაპირ იყო ჩართული. ის სწორედ ამ დანაშაულის გადასაფარად წერილების მეშვეობით თავის გადარჩენას ცდილობდა.

ირაკლი ღარიბაშვილს ბრალი წარდგენილი აქვს მიმდინარე წლის იანვრიდან და მსჯავრდადებულია მძიმე დანაშაულში — უკანონო შემოსავლის მიღებაში. ასევე მისთვის, როგორც კონკრეტულ დანაშაულში ჩართული პირისთვის ცნობილი იყო, რომ გამოძიება მიმდინარეობდა სხვა დანაშაულთან მიმართებით, რომელიც მძიმე კორუფციული ხასიათის დანაშაულია. აქედან გამომდინარე, საკუთარი თავი რომ გადაერჩინა, ისეთი წერილები გაავრცელა, რომლებიც ერთმანეთს ეწინააღმდეგება.

ადამიანი როცა იტყუება, ერთმანეთში ირევა მის მიერ გავრცელებული სხვადასხვა მოგონილი ინფორმაცია. ახლა მას ბრალი აქვს წარდგენილი, რაც დღევანდელი ბრიფინგიდან გამომდინარე დადასტურებულია. მისი მცდელობა საკუთარი თავის გადარჩენა და პასუხისმგებლობიდან გაქცევა იყო.

რა პოლიტიკაში დაბრუნებაზე და რა პოლიტიკურ ბრძოლაზე შეიძლება იყოს საუბარი, როცა ადამიანს თავადვე აქვს აღიარებული განსაკუთრებით დიდი ოდენობის არალეგალური თანხების მიღება, რაც არ იყო დეკლარირებული და საზოგადოებისთვის ცნობილი. როცა ადამიანს ასეთი დანაშაული აქვს აღიარებული, წესით და რიგით, მას პოლიტიკაში არაფერი ესაქმება. დანარჩენი ინსინუაციებია, რაც მან საკუთარი თავის გადასარჩენად დაიწყო, რადგან იცოდა, მის მიმართ სხვა სავარაუდო დანაშაულის ფაქტებზე მიმდინარე გამოძიების შესახებ.

ყველას ნათქვამი, იქნება ეს კოლექტიური ნაცმოძრაობის თუ კონკრეტულად ირაკლი ღარიბაშვილის მხრიდან არის მცდელობა იმისა, რომ სისხლის სამართლის საქმის წარმოებაში პოლიტიკა შეიტანონ. სამართლებრივი საქმის პოლიტიზების ნებისმიერი მცდელობა კრახისთვის არის განწირული, რადგან ასეთი საქმეები სტრასბურგის სასამართლოში მიდის ხოლმე, სადაც ყოველთვის დასტურდება, რომ როგორც სამართალდამცავი ორგანოების, ასევე სასამართლოს სისტემის საქმიანობა სრულად შესაბამისობაშია როგორც საქართველოს კონსტიტუციასთან, ისე ქართულ კანონმდებლობასა და ევროპული სასამართლოს პრაქტიკასთან", – განაცხადა არჩილ გორდულაძემ (IPN).

აღნიშნულთან დაკავშირებით განცხადება გააკეთა თბილისის მერმა, კახა კალაძემაც. მისი თქმით, ღარიბაშვილის განცხადებები ურთიერთგამომრიცხავი იყო. კალაძის განმარტებით, ღარიბაშვილს "სავარაუდოდ, ჰქონდა ინფორმაცია იმ სხვადასხვა საკითხზე, რომელზეც მიმდინარეობდა გამოძიება და ალბათ, პრევენციული სახის განცხადება" გააკეთა.

"ძალიან სამწუხაროა და არასასიამოვნოა, როდესაც ყოფილ თანაგუნდელზე გიწევს საუბარი. ჩვენ რამდენიმე დღის წინ ვიხილეთ მისი მხრიდან გაკეთებული ურთიერთგამომრიცხავი განცხადებები. სავარაუდოდ, მას ჰქონდა ინფორმაცია იმ სხვადასხვა საკითხზე, რომელზეც მიმდინარეობდა გამოძიება და ალბათ, პრევენციული სახის განცხადება ჰქონდა. ყოფილი პოლიტიკოსები ზოგადად ხშირად იყენებენ აღნიშნულ მეთოდს და სამართლებრივი საკითხების პოლიტიკურ ჭრილში გადაყვანა ხდება ხოლმე. ძალიან მიჭირს ამაზე საუბარი. ის ჩვენი ყოფილი თანაგუნდელია. ერთი რამ შემიძლია გითხრათ: ქვეყანაში როგორც ირაკლი ღარიბაშვილის, ისე ყველა პატიმრის უსაფრთხოება და უფლებები არის დაცული", — განაცხადა კახა კალაძემ.


შეგახსენებთ, რომ ირაკლი ღარიბაშვილმა პირველი წერილი ციხიდან 18 აგვისტოს გამოაქვეყნა, სადაც საკუთარ და ოჯახის უსაფრთხოებაზე პასუხისმგებლობა ბიძინა ივანიშვილს და ხელისუფლებას დააკისრა. ამას მოჰყვა მეორე წერილი, რომელიც 19 აგვისტოს გამოქვეყნდა. რიგით მესამე წერილი სოციალურ ქსელში 20 აგვისტოს გასაჯაროვდა.

პროკურატურამ განსაკუთრებით დიდი ოდენობით ქრთამის, წინასწარი შეთანხმებით ჯგუფის მიერ აღების ფაქტზე საქართველოს ყოფილ პრემიერმინისტრს, ირაკლი ღარიბაშვილს ბრალდება დღეს წარუდგინა. დანაშაული 11-დან 15 წლამდე თავისუფლების აღკვეთას ითვალისწინებს.

საქმე ეხება თავდაცვის სამინისტროში ძვირადღირებული სამედიცინო აპარატურისა და ინვენტარის შეძენის საქმეს, რაზეც მაშინდელი თავდაცვის მინისტრი, ჯუანშერ ბურჭულაძე უკვე ბრალდებულია. გამოძიების ცნობით, 12 აგვისტოს, პროკურატურას გამოძიებასთან თანამშრომლობის სურვილით მომართა საქართველოს ყოფილი თავდაცვის მინისტრის ნათესავმა, მსჯავრდებულმა ვასილ მხეიძემ და გამოძიებას მიაწოდა მის ხელთ არსებული სრული ინფორმაცია. ასევე დაიკითხა და გამოძიებასთან ითანამშრომლა ჯუანშერ ბურჭულაძემაც.