თუ ოდესმე სამსახურიდან უზომოდ დაღლილი წამოსულხარ და ტრანსპორტის ნაცვლად ფეხით წასვლა აგირჩევია — თან ისე, რომ იცი, სხეულს კიდევ უფრო მეტ ფიზიკურ დაღლას ამატებ — სწორ ადგილას მოხვდი.

წესით, სახლში დროულად მისვლა უნდა გინდოდეს და თან, რაც შეიძლება სწრაფად. და მაინც, სამსახურიდან გამოსული, ფეხით სიარულს იწყებ, ზოგჯერ შორს გზასაც არჩევ ან ერთი გაჩერებით ადრე ჩამოდიხარ ტრანსპორტიდან. ვინმემ რომ გკითხოს, რატომ იღლი თავს უფრო მეტადო, შეიძლება პასუხიც ვერ გასცე.

ის, რასაც ამ დროს აკეთებ, უცნაურია, მაგრამ ძალიან ლოგიკური: ფიზიკურ დაღლას იყენებ იმისთვის, რომ გადაღლილი გონება დაასვენო.

ფოტო: Pinterest

გარდა ამისა, ეს გზა, მხოლოდ სახლში მისასვლელი გზა არაა, დერეფანია ორ მდგომარეობას შორის.

არ აქვს მნიშვნელობა, სახლში ოჯახი გელოდება, რომელიც უამრავ პასუხს ითხოვეს შენგან თუ სრულიად მარტო ცხოვრობ და კარს რომ შეაღებ, სიჩუმე დაგხვდება. თუ სამსახურიდან სახლში დროზე ადრე აღმოჩნდები, სამუშაო დღის ხმაურს, ტვირთს და დაძაბულობასაც აუცილებლად შეიყოლებ.

სწორედ ფეხით დამატებითი 15-20 სიარული არის ის ერთადერთი მონაკვეთი დღეში, როცა არავისი ხარ — არც სამსახურის, არც ოჯახის და არც საკუთარი პასუხისმგებლობების.

ამიტომ არის ეს გზა ასეთი ძვირფასი. არა იმიტომ, რომ ლამაზ ხედებს ეძებ, სუფთა ჰაერი გინდა ისუნთქო (რომც გვქონდეს) ან დღის მანძილზე გადასადგმელი ნაბიჯების ლიმიტი გაქვს შესავსები, არამედ იმიტომ, რომ დროის იმ მონაკვეთში შენგან არავინ არაფერს ელოდება.

სამუშაოსგან გონებრივი გამოთიშვა — ის, რომ სამსახური თავშიც დაასრულო და არა მხოლოდ კომპიუტერთან — დაღლილობის შემცირებას პირდაპირ უკავშირდება. ფეხით სეირნობა კი ამ შედეგის მიღების ყველაზე მარტივი გზაა.

ამიტომ, თუ ხვალაც გრძელ გზას აირჩევ და დაღლილი მაინც ფეხით დაბრუნდები სახლში, გახსოვდეს, რომ ეს ტყუილად გაფლანგული ენერგია არ არის. პირიქით, ზუსტად გეცოდინება, რომ შინ ნამდვილი და საკუთარი თავი დაბრუნდი.