ეროვნული ბანკი სოციალურ ქსელებში გავრცელებულ კრიპტოინვესტიციების სქემებთან დაკავშირებით მოქალაქეებს აფრთხილებს. სებ-ის მომხმარებელთა უფლებების დაცვის დეპარტამენტის უფროსი, ლაშა გზირიშვილი მოსახლეობას მოუწოდებს, კრიპტოაქტივებით თანხის გამომუშავების შეთავაზებებს განსაკუთრებული სიფრთხილით მოეკიდონ და დაფიქრდნენ რისკებზე, ვიდრე საკუთარ დანაზოგს დააბანდებენ.

გზირიშვილის განმარტებით, სოციალურ ქსელებში სულ უფრო ხშირად ჩნდებიან კომპანიები, რომლებიც მოქალაქეებს კრიპტოაქტივებით სწრაფ მოგებასა და სქემაში ახალი წევრების ჩართვის სანაცვლოდ დამატებით შემოსავალს ჰპირდებიან.

"ბოლო პერიოდში სოციალურ ქსელებში, მათ შორის Facebook-ის გვერდებსა და ჯგუფებში, გამოჩნდნენ კომპანიები, რომლებიც მომხმარებლებს კრიპტოაქტივებში ინვესტირებას და ამ გზით თანხის გამომუშავებას სთავაზობენ. ასევე, მათ სთხოვენ, რომ სქემაში ახალი ადამიანებიც გააწევრიანონ და ამ გზით დამატებითი შემოსავალიც მიიღონ", — აღნიშნავს გზირიშვილი.

სებ-ის წარმომადგენელი აღნიშნავს, რომ ასეთი შეთავაზებები ხშირად კლასიკურ ფინანსურ პირამიდას წარმოადგენს, სადაც მოგების წყარო არა რეალური ბიზნესსაქმიანობა, არამედ ახალი მონაწილეების მიერ შეტანილი თანხებია.

"გვურს, მოსახლეობა გავაფრთხილოთ, რომ მსგავსი ტიპის საქმიანობა, შესაძლოა, ფინანსური პირამიდის კლასიკურ მაგალითს წარმოადგენდეს, როდესაც მთავარი მიზანი არა მოზიდული სახსრების მომგებიან საქმიანობაში ინვესტირებაა, არამედ რაც შეიძლება მეტი ახალი ადამიანის და თანხების მოზიდვა, რადგან სწორედ ამ მოზიდული თანხებით ხდება სქემის მონაწილეებისთვის თანხის გადახდა", — ამბობს გზირიშვილი.

ლაშა გზირიშვილის თქმით, პირამიდა თავიდან შესაძლოა მომგებიანად ჩანდეს, თუმცა ახალი წევრების ნაკადის შეწყვეტისთანავე ის აუცილებლად ჩამოიშლება, რაც ინვესტორების დანაკარგით სრულდება.

"თავდაპირველ ეტაპზე, როდესაც სქემა კარგად ფუნქციონირებს და მასში ბევრი ადამიანი წევრიანდება, შესაძლოა კომპანია მომგებიანიც ჩანდეს და მომხმარებლებმა გარკვეული სარგებელიც კი მიიღონ, მაგრამ დროის გარკვეულ მონაკვეთში, როდესაც ახალი წევრების მოზიდვა შეუძლებელი ხდება, სქემა აუცილებლად დაიშლება", — აღნიშნა გზირიშვილმა.

ეროვნული ბანკი მოქალაქეებს მოუწოდებს, გადაწყვეტილების მიღებამდე დეტალურად შეამოწმონ კომპანია და არ ენდონ მხოლოდ დაპირებებს.

"ამის გამო, გვურს მოსახლეობა კიდევ ერთხელ გავაფრთხილოთ და მოვუწოდოთ, რომ ნებისმიერი შემოთავაზების დროს, მათ შორის კრიპტოაქტივებში ინვესტირებასთან დაკავშირებით, წინასწარ დეტალური ინფორმაცია მოიძიონ შეთავაზების შესახებ და შემდეგ მიიღონ გადაწყვეტილება. მე გაგიზიარებთ რამდენიმე პრაქტიკულ რჩევას, რომელიც დაგეხმარებათ ინფორმირებული გადაწყვეტილების მიღებაში", — აღნიშნმავს, სებ-ის მომხმარებელთა უფლებების დაცვის დეპარტამენტის უფროსი.

როგორ ავარიდოთ თავი თაღლითობას? — სებ-ის რჩევები

შეამოწმეთ ბიზნესის არსი: დაინტერესდით, კონკრეტულად რაში აბანდებს კომპანია თქვენს ფულს და შესაძლებელია თუ არა მოგების მიღება ახალი წევრების მოყვანის გარეშე.

"პირველ რიგში, როდესაც მსგავს შემოთავაზებას ნახავთ, აუცილებლად დაინტერესდით, კონკრეტულად რა საქმიანობას ეწევა ეს კომპანია, თქვენგან მოზიდულ სახსრებს რა ბიზნეს საქმიანობაში დაბანდებს, ასევე — რატომ არის სქემაში ახალი ადამიანების გაწევრიანება საჭირო და ამის გარეშე შესაძლებელია თუ არა თანხის გამომუშავება", — ამბობს გზირიშვილი.

გადაამოწმეთ ლიცენზია: ხშირად კომპანიები ნდობის მოსაპოვებლად ფინანსურ ტერმინოლოგიას იყენებენ, თუმცა შესაბამისი ნებართვა არ გააჩნიათ.

"ასევე, ხშირად მსგავსი კომპანიები მომხმარებლის შეცდომაში შეყვანის მიზნით ხშირად იყენებენ ხოლმე ისეთ ტერმინებს, როგორიცაა "საფინანსო", "საბროკერო" და ა.შ. აუცილებლად დაინტერესდით, ამ კომპანიას აქვს თუ არა შესაბამისი საქმიანობისთვის საჭირო ლიცენზია და არის თუ არა რომელიმე მარეგულირებლის მიერ ლიცენზირებული სუბიექტი", — აღნიშნა გზირიშვილმა.

გააანალიზეთ რისკები: დაელაპარაკეთ სქემის არსებულ მონაწილეებს და გამოიკვლიეთ არა მხოლოდ წარმატებული, არამედ წაგებული ინვესტიციების მაგალითებიც.

"და ბოლოს, სქემის უშუალო მონაწილეებისგან გაარკვიეთ როგორც წარმატების, ასევე წარუმატებლობის მაგალითები. კარგად მოიძიეთ ინფორმაცია და მხოლოდ შემდეგ მიიღეთ ინფორმირებული გადაწყვეტილება", — აღნიშნმავს, სებ-ის მომხმარებელთა უფლებების დაცვის დეპარტამენტის უფროსი.