ჩეჩნეთის ლიდერის, რამზან კადიროვის შვილმა, ადამ კადიროვმა განაცხადა, რომ კიდევ ერთი ჯილდო — ამჯერად ოკუპირებული აფხაზეთის დეფაქტო თავდაცვის სამინისტროსგან მიიღო.

18 წლის ადამ კადიროვის თქმით, მას გადაეცა მედალი "საბრძოლო მეგობრობისთვის" — "მაღალი დონის ურთიერთქმედებისა და თანამშრომლობის განმტკიცებისთვის". ინფორმაციას OC media ავრცელებს.

ადამ კადიროვი რამზან კადიროვის მესამე ვაჟია. მან საზოგადოების ყურადღება 2023 წელს მიიპყრო, როდესაც გავრცელდა ვიდეო, სადაც ჩანს, როგორ სცემს ის გროზნოს საგამოძიებო იზოლატორში ყურანის დაწვაში ბრალდებულ ნიკიტა ჟურაველს. ვიდეოს გამოქვეყნების შემდეგ რამზან კადიროვმა განაცხადა, რომ შვილის საქციელით ამაყობდა. რუს სამართალდამცველებს ადამ კადიროვის წინააღმდეგ სისხლისსამართლებრივი დევნა არ დაუწყიათ.

ამ ინციდენტის შემდეგ ადამ კადიროვმა ჩეჩნეთისა და რუსეთის სხვადასხვა უწყებებისგან უამრავი ჯილდო მიიღო. მათ შორის იყო ახმატ კადიროვის ორდენი, რომელიც მას 2024 წლის აგვისტოში გადაეცა.

ბოლო წლებში ადამ კადიროვი რეგულარულად ჩნდება ოფიციალურ ღონისძიებებზე რესპუბლიკის ხელმძღვანელობასთან ერთად. 2024 წელს იგი გუდერმესში ძალოვანი სტრუქტურებისა და OMON-ის სკოლის კურატორად დაინიშნა, ასევე დაიკავა ჩეჩნეთის უშიშროების საბჭოს მდივნის თანამდებობა. 2026 წლის დასაწყისში მას "ჩეჩნეთის გმირის" წოდება მიენიჭა.