2026 წლის ორი კვარტლის მონაცემებით, საქართველოში ჩინეთიდან 54,554 საერთაშორისო ვიზიტი შედგა. ტურიზმის ეროვნული ადმინისტრაციის მონაცემებით, ეს მაჩვენებელი 16.7%-ით მეტია გასული წლის ანალოგიურ პერიოდთან შედარებით. მეორე კვარტალში ზრდამ 3.2% შეადგინა.

მათივე ცნობით, საქართველო წელს შანხაიში, აზიის ერთ-ერთ უმსხვილეს ტურისტულ გამოფენაზე ITB China 2026-ზე, პარტნიორი ქვეყნის სტატუსით წარდგა.

ტურიზმის ეროვნულმა ადმინისტრაციამ აქტიური კამპანია დაიწყო ჩინეთის ციფრულ ბაზარზე, ისეთ მრავალმილიონიან პლატფორმებზე, როგორებიცაა: WeChat, Douyin, RedNote და Weibo. თანამშრომლობა მიმდინარეობს ჩინეთის უმსხვილეს ონლაინ ტურისტულ პლატფორმასთანTrip.com, რაც პირდაპირ რეჟიმში შეუწყობს ხელს ჯავშნების სტიმულირებას. პარალელურად, ჩინეთის უმსხვილესი ქალაქების ხალხმრავალ მოედნებსა და ქუჩებში საქართველოს საიმიჯო ბანერები და ვიზუალური მასალები განთავსდა.

სარეკლამო კამპანიებთან ერთად, საქართველოში ტარდება გაცნობითი (ინფო) ტურები. ქვეყანას სტუმრობენ ჩინელი ინფლუენსერები და ბლოგერები, რომლებიც სოციალურ ქსელებში საკუთარ აუდიტორიას საქართველოს უნიკალურ კულტურასა და ტურისტულ პროდუქტებს აცნობენ.

აღსანიშნავია, რომ ჩინეთის მიმართულებით ფრენებს დაემატა ახალი რეისი: შანხაი-თბილისი-შანხაი, რომელსაც China Eastern Airlines კვირაში 3 სიხშირით ასრულებს. შედეგად, ჩინეთიდან საქართველოში ფრენები უკვე სამი მიმართულებით ხორციელდება, რომლებსაც ავიაკომპანიები Air China და China Eastern Airlines ასრულებენ", — ნათქვამია ტურიზმის ეროვნული ადმინისტრაციის მიერ გავრცელებულ ინფორმაციაში.