"ქართული ოცნება საქართველოს ჩინეთის კომუნისტურ პარტიაზე ყიდის!" — ამის შესახებ ამერიკელმა კონგრესმენმა ჯო უილსონმა X-ზე დაწერა და Civil Georgia-ს სტატია გამოაქვეყნა, სადაც აღნიშნულია, რომ ჩინეთი საქართველოს უმსხვილესი ინვესტორია. უილსონის განმარტებით, ჩინეთის კომუნისტურმა პარტიამ, ქართული ოცნების ანტიამერიკული რეჟიმის წყალობით, საქართველოში უმსხვილესი ინვესტორის პოზიციაზე დიდ ბრიტანეთს გადაასწრო.

"ჩინეთის კომუნისტურმა პარტიამ, ქართული ოცნების ანტიამერიკული რეჟიმის წყალობით, საქართველოში უმსხვილესი ინვესტორის პოზიციაზე დიდ ბრიტანეთს გადაასწრო. ჩინეთის კომუნისტური პარტიის "ინვესტიცია" ყოველთვის დამანგრეველია და ქვეყანაზე კონტროლის დამყარებას ისახავს მიზნად. ქართული ოცნება საქართველოს ჩინეთის კომუნისტურ პარტიაზე ყიდის!", — დაწერა ჯო უილსონმა.

ცნობისთვის, გუშინ საქსტატმა 2026 წლის II კვარტალის პირდაპირი უცხოური ინვესტიციების წინასწარი მონაცემები გამოაქვეყნა, რომლის მიხედვითაც, უმსხვილესი ინვესტორი ჩინეთი გახდა. მეორე ადგილზე კი დიდი ბრიტანეთია.