თუშეთში, უხვი ნალექისა და თოვლის ინტენსიური დნობის შედეგად, მდინარეები კალაპოტიდან გადმოვიდა, რამაც სოფელ შენაქოს საავტომობილო ხიდის მისასვლელი მონაკვეთი მთლიანად დააზიანა და საყრდენი გამოურეცხა — გზა სრულად ჩამოიშალა. აღნიშნული ხიდი ერთადერთი დამაკავშირებელი არტერიაა, რომელიც სოფლებს — შენაქოსა და დიკლოს ომალოსთან და ბარის მიმართულებასთან აკავშირებს. ამის შესახებ ინფორმაციას "თუშეთის დაცული ლანდშაფტი" ავრცელებს.

"მოსახლეობისა და ვიზიტორების საყურადღებოდ.

თუშეთში უხვი ნალექისა და თოვლის ინტენსიური დნობის შედეგად, მდინარეების დონემ კრიტიკულ ზღვარს მიაღწია. აღნიშნული სტიქიური მოვლენების გამო, სოფელ შენაქოს საავტომობილო ხიდის მისასვლელ მონაკვეთზე წყლის ნაკადმა სრულად გამორეცხა საყრდენი, რამაც გზის საფუძვლის მთლიანი ჩამოშლა გამოიწვია. აღნიშნული ხიდი უზრუნველყოფს სოფლების — შენაქოსა და დიკლოს კავშირს სოფელ ომალოსთან, ასევე, ბარის მიმართულებასთან", — აღნიშნულია განცხადებაში.

"თუშეთის დაცული ლანდშაფტი" მოუწოდებს ადგილზე მყოფ მოქალაქეებსა და ტურისტებს, მაქსიმალური სიფრთხილე გამოიჩინონ, დარჩნენ თავშესაფრებში და თავი შეიკავონ დაზიანებული ინფრასტრუქტურისკენ გადაადგილებისგან. გადაუდებელი საჭიროების შემთხვევაში, მათ დაუყოვნებლივ უნდა მიმართონ 112-ს ან უწყების წარმომადგენელს.

"თუ იმყოფებით სოფელ შენაქოს ან დიკლოს ტერიტორიაზე, გთხოვთ, დარჩეთ სახლში, საოჯახო სასტუმროებში და თავი შეიკავოთ ხიდის მიმართულებით გადაადგილებისგან.

ნებისმიერი ლოგისტიკური, სამედიცინო თუ გადაუდებელი საჭიროების წარმოქმნის შემთხვევაში, დაუყოვნებლივ დაუკავშირდით საგანგებო სიტუაციების მართვის სამსახურს (112) ან ადმინისტრაციას (საკონტაქტო ტელეფონის ნომერი: +995 599 004 972 — ლადო კახოიძე)", — წერია განცხადებაში.

ამასთანავე, განცხადებაში ხაზგასმითაა აღნიშნული, რომ საფრთხე ჯერ კიდევ რეალურია, ვინაიდან გრუნტის ჩამოშლის პროცესი ამ დრომდე გრძელდება. შესაბამისი სამსახურები უკვე საქმის კურსში არიან და გეგმავენ შემდგომ ნაბიჯებს, ხოლო გზაზე მოძრაობის აღდგენის თაობაზე საზოგადოებას ინფორმაცია ეტაპობრივად მიეწოდება.

"უსაფრთხოების ნორმების გათვალისწინებით, მკაცრად აკრძალულია დაზიანებულ საგზაო მონაკვეთთან ტრანსპორტით მიახლოება, ვინაიდან გრუნტის ჩამოშლის პროცესი კვლავ დინამიურია.

შემქნილი ვითარების შესახებ ოპერატიულად არის ინფორმირებული ყველა პასუხისმგებელი სახელმწიფო უწყება. მიმდინარეობს კოორდინირებული მუშაობა პრევენციული ღონისძიებებისა და შემდგომი ნაბიჯების დასაგეგმად.

ომალო — შენაქო — დიკლოს საავტომობილო გზაზე მოძრაობის აღდგენისა და მიმდინარე სამუშაოების შესახებ ინფორმაცია ეტაპობრივად გავრცელდება", — წერს "თუშეთის დაცული ლანდშაფტი".