ევროსაბჭოს საპარლამენტო ასამბლეა 24 ივნისს, ზაფხულის პლენარული სესიის ფარგლებში, საქართველოს შესახებ ანგარიშს განიხილავს.

ანგარიში სახელწოდებით — "დემოკრატიული ინსტიტუტების ფუნქციონირება საქართველოში" – მომხსენებლებმა ედიტე ესტრელამ (პორტუგალია, SOC) და საბინა ჩუდიჩმა (ბოსნია და ჰერცეგოვინა, ALDE) მოამზადეს.

განხილვაზე საქართველოს ხელისუფლების წარმომადგენლები მიწვეული არ არიან. როგორც "ევროსკოპი" წერს. მათი კითხვის საპასუხოდ ევროსაბჭოს საპარლამენტო ასამბლეის პრესსამსახურიდან მოiწერეს, რომ "საქართველოს პარლამენტი არ არის მიწვეული გაფართოების საკითხებზე საპარლამენტთაშორისო კომიტეტის სხდომაზე, რომელიც 2026 წლის 24 ივნისს ევროპარლამენტში გაიმართება".

"ევროპარლამენტმა არაერთხელ განაცხადა, რომ არ აღიარებს საქართველოს პარლამენტის ლეგიტიმურობას და არც მის მიერ დანიშნული პრეზიდენტის ლეგიტიმურობას.

ევროპარლამენტმა ევროკავშირის წევრ სახელმწიფოებს მოუწოდა, რომ ქართული ოცნების ხელისუფლებასთან პოლიტიკური კონტაქტები მხოლოდ მკაცრი აუცილებლობის საკითხებით შემოიფარგლოს, ხოლო ამავდროულად შენარჩუნდეს და გაძლიერდეს თანამშრომლობა საქართველოს სამოქალაქო საზოგადოებასთან, დამოუკიდებელ მედიასთან და აკადემიურ ინსტიტუტებთან.

ევროპარლამენტი სრულ სოლიდარობას უცხადებს ქართველ ხალხს, რომელიც აგრძელებს ბრძოლას ევროპული და დემოკრატიული საქართველოსთვის", — წერია გავრცელებულ წერილში.

ევროსაბჭოს საპარლამენტო ასამბლეის წევრი ემანუელის ზინგერისი საქართველოზე რეზოლუციის კენჭისყრამდე "ევროსკოპთან" აცხადებს, რომ ერთ დროს "ჩემპიონი საქართველო", ახლა “ევროპის წინააღმდეგაა".

"ზინგერისმა ისაუბრა ირანის გავლენებზეც საქართველოში. "საქართველოს ხელისუფლება არ ასრულებს ევროსაბჭოს არც ერთ გადაწყვეტილებას", — აცხადებს დეპუტატი, "ძალიან სამწუხაროა რომ, თავისუფლების მოყვარე ქართველი ხალხი მეტ-ნაკლებად პრორუსი ხელისუფლების სერიოზული ინტრიგების წინაშეა", "ახლა ჩვენ ვამყარებთ ჩვენს ევროპულ ერთიანობას და სწორედ ამ დროს, ამ გამყარების პროცესში, ხელისუფლება საქართველოში უმოქმედოდაა", — წერს "ევროსკოპი".