1-ელ ივნისს პროსამთავრობო ტელეკომპანია "იმედმა" გერმანიაში საქართველოს ელჩად დანიშნული ალექსანდრე კარტოზიას შესახებ ინფორმაცია გაავრცელა. მათი ცნობით, გერმანიაში საქართველოს ელჩად 2025 წლის სექტემბერში დანიშნული კარტოზია გერმანიის მთავრობისგან აკრედიტაციის პროცედურის დასრულებას კვლავ ელოდება.

ირაკლი კობახიძის შეფასებით, გერმანიის მთავრობის ეს ქმედება "ისეთივე არასერიოზულია", როგორც გერმანიის ელჩი საქართველოში, პეტერ ფიშერი.

"გერმანული ხელისუფლების ეს ნაბიჯები ისეთივე არასერიოზულია, როგორიც არის გერმანიის ელჩი საქართველოში და მისი ქმედებები. ძალიან სამწუხაროა ეს ყველაფერი, თან საქმე ეხება გერმანიას, რომელიც ისტორიულად გამოირჩეოდა როგორც პრინციპებზე დაფუძნებული სახელმწიფო. ეს პრინციპები სადღაც გაქრა, რაც არის ძალიან დასანანი და ძალიან სამწუხარო. ვებგვერდზეც კი რომ ვერ ახერხებენ ინფორმაციის განახლებას. ეს უკვე სრულიად არასერიოზულია, აღარაფერს ვამბობ, რა თქმა უნდა, ბევრ სხვა ქმედებაზე და ელჩისთვის შეხვედრის არჩანიშვნაც არის ამის მორიგი გამოხატულება," — განაცხადა კობახიძემ.

საგარეო უწყებამ რადიო თავისუფლებას განუცხადა, რომ კარტოზია ელჩად "გერმანიის ფედერაციული რესპუბლიკის მხრიდან 2025 წლის 10 სექტემბერს გაცემული აგრემანის საფუძველზე" დაინიშნა. უწყების განმარტებით, "საქართველოს საგანგებო და სრულუფლებიან ელჩს რწმუნებათა სიგელები გერმანიის ფედერაციული რესპუბლიკის პრეზიდენტისათვის ამ დრომდე არ გადაუცია" და ხაზი გაუსვეს, რომ "რწმუნებათა სიგელების ასლები გერმანიის ფედერალურ საგარეო უწყებას 2025 წლის 17 დეკემბერს ჩაჰბარდა".