აშშ-ის პრეზიდენტმა დონალდ ტრამპმა განაცხადა, რომ შეერთებული შტატები უფრო მეტად არის განწყობილი სამხედრო მოქმედებების გაგრძელებისკენ, ვიდრე ირანი. მან დასძინა, რომ ვაშინგტონი აღარ არის მზად შეთანხმების დასადებად.

ისინი მეკითხებიან: "როგორ შეგვიძლია შეთანხმების დადება?" მე ვუთხარი: "ცოტა დააგვიანეთ". "და ახლა ჩვენ მათზე მეტად გვინდა ბრძოლა", — განაცხადა ტრამპმა.

დონალდ ტრამპმა განაცხადა, რომ მას სურს ირანის ხელმძღვანელობის სრული ცვლილება.

მისივე თქმით, აშშ-ისრაელის ოპერაციის დროს ირანმა დაკარგა რაკეტების 60% და გამშვები მოწყობილობების 64%.

"რაკეტები გაქრა. გამშვები მოწყობილობები გაქრა, შესაბამისად, დაახლოებით 60% და 64%", — განუცხადა ტრამპმა ჟურნალისტებს.

ამასობაში, ირანის საგარეო საქმეთა მინისტრმა აბას არაღჩიმ უკვე გამოაცხადა "სრულმასშტაბიანი ომის" დაწყების შესახებ. მან აღნიშნა, რომ თეირანი უზენაესი ლიდერის, აიათოლა ალი ხამენეის მკვლელობისთვის შურისძიებას აპირებს. თუმცა, ისრაელის თავდაცვის ძალები მიიჩნევენ, რომ ირანის წინააღმდეგ ოპერაცია მინიმუმ ერთი კვირა გაგრძელდება.

28 თებერვალს ისრაელმა და ამერიკის შეერთებულმა შტატებმა ირანის სხვადასხვა ობიექტზე კოორდინირებული ერთობლივი იერიში მიიტანეს. ოპერაციას ისრაელის მხრიდან "ლომის ღრიალი", ხოლო აშშ-ის თავდაცვის დეპარტამენტის მიერ — "ეპიკური მრისხანება" ეწოდა.

თავდასხმის სამიზნეს მაღალჩინოსნები, სამხედრო მეთაურები და სტრატეგიული ობიექტები წარმოადგენდნენ. იერიშები მიზნად რეჟიმის შეცვლას ისახავს. იერიშის შედეგად მოკლულია ირანის უმაღლესი ლიდერი აიათოლა ალი ხამენეი.

მედიაში გავრცელებული ცნობებით, ირანის ახალ სულიერ ლიდერად ალი ხამენეის ვაჟი მოჯტაბა აირჩიეს. სააგენტო Tasnim-ის ცნობით, ირანის ტერიტორიაზე აშშ-სა და ისრაელის მიერ განხორციელებული დარტყმების შედეგად, 1045 ადამიანი დაიღუპა.