"იდუმალებით მოცულმა ქართველმა ბიტკოინების ინვესტორმა მაიამის სასახლე $51.5 მლნ-ად გაყიდა, ბიზნესმენის ადგილსამყოფელი კი უცნობია", — ამ სათაურით აქვეყნებს News York Post სტატიას ბიძინა ივანიშვილთან დაახლოებულ ბიზნესმენსა და საქართველოს თანაინვესტირების ფონდის ყოფილ ხელმძღვანელ გიორგი ბაჩიაშვილზე.

გამოცემა წერს, რომ 41 წლის ქართველმა ფინანსისტმა, რომლის ცხოვრებაც ჯონ ლე კარეს ჯაშუშურ რომანს ჰგავს, მაიამიში, დაცულ ჰიბისკუსის კუნძულზე, ახლახან აშენებული სასახლე გაყიდა.

გარიგება ჰიბისკუსისა და პალმის კუნძულებისთვის რეკორდული აღმოჩნდა. მან გადააჭარბა 2024 წლის გაყიდვის ფასს, როდესაც "მაიამის იდუმალმა წვეულებების მოყვარულმა" დანიელ ლიბურდიმ 101 North Hibiscus Drive-ში მდებარე სახლისთვის $40.25 მლნ გადაიხადა.

გამოცემა წერს, რომ უძრავი ქონების ბაზარზე სახლის გატანამდე გიორგი ბაჩიაშვილმა თბილისი დატოვა. ეს მოხდა ცოტა ხნით ადრე, ვიდრე 2025 წლის 10 მარტს მას დაუსწრებლად 11 წლით თავისუფლების აღკვეთა მიუსაჯეს. მას საქართველოს ყოფილი პრემიერმინისტრისა და ქვეყნის ერთ-ერთი ყველაზე გავლენიანი ადამიანის, ბიძინა ივანიშვილის — კუთვნილი კრიპტოვალუტის სავარაუდო მითვისებას ედავებოდნენ. ბაჩიაშვილი ბრალდებებს უარყოფდა და აცხადებდა, რომ საქმე პოლიტიკურად იყო მოტივირებული.

"შემდეგ, 2025 წლის 24 მაისს, ბაჩიაშვილი, სავარაუდოდ, აბუ-დაბიში გაიტაცეს და საქართველოში ჩამოიყვანეს, სადაც, როგორც გამოცემა წერს, ის მისმა ყოფილმა დამსაქმებელმა დააპატიმრა. საპროცესო შეთანხმების გაფორმების შემდეგ მისთვის შეფარდებული სასჯელის აღსრულება შეჩერდა და თებერვალში, ერთ წელზე ნაკლები ხნის პატიმრობის შემდეგ, ის გაათავისუფლეს", — წერს News York Post.

ბაჩიაშვილის ადგილსამყოფელი კვლავ უცნობია, — განუცხადა გამოცემას ბიზნესმენის ადვოკატმა, პიტერ ჯ. საჰლასმა, იურიდიული ფირმიდან Amsterdam & Partners.

აგვისტოს შუა რიცხვებში, ციხიდან გათავისუფლებიდან დაახლოებით ექვსი თვის შემდეგ, ბაჩიაშვილმა მაიამის ეს სახლი გასაყიდად გამოიტანა. 11 დღის შემდეგ კი ის უცნობ მყიდველს $51.5 მლნ-ად მიჰყიდა. გარიგების შესახებ პირველად გამოცემა The Real Deal-მა დაწერა.

270 South Hibiscus Drive-ზე მდებარე თანამედროვე სასახლს ხუთი საძინებელი, პერსონალისთვის განკუთვნილი ოთახები, ექვსი სრული და ორი ნახევარი სააბაზანო, სამუშაო ოთახი და სპორტდარბაზი აქვს. სახლს ასევე აქვს დაახლოებით 37-მეტრიანი სანაპირო ზოლი აქვს. ინტერიერში მოწყობილია დიდი ფოიე, ორმაგი სიმაღლის მისაღები სივრცე და პროფესიონალური სამზარეულო.

ქონების ჩანაწერების მიხედვით, ბაჩიაშვილმა ეს უძრავი ქონება 2021 წელს $19 მლნ-ად შეიძინა. მაშინ, წყაროს ცნობით, სახლი ჯერ კიდევ მშენებლობის პროცესში იყო და ფაქტობრივად მხოლოდ "დაუსრულებელ კარკასს" წარმოადგენდა. მოგვიანებით ბაჩიაშვილმა სახლის დიზაინის შესაქმნელად სამხრეთაფრიკული კომპანია SAOTA დაიქირავა.

სასახლის გამორჩეულ მახასიათებლებს შორისაა ხმისგან იზოლირებული სახლის კინოთეატრი ბარით. სახლს ასევე აქვს საცურაო აუზი და ორი კერძო ნავმისადგომი. სახლი ყურის სანაპიროზე მდებარე ორ ნაკვეთზეა გაშენებული და ნავმისადგომებს მინიმუმ 105 ფუტის, ანუ დაახლოებით 32-მეტრიანი იახტის მიღება შეუძლია.