სპეციალური პენიტენციური სამსახური სახალხო დამცველის, ლევან იოსელიანის იმ განცხადებას ეხმაურება, რომელიც მან ექსპრემიერთან ციხეში ვიზიტის შემდეგ გააკეთა. პენიტენციური სამსახური უარყოფს იოსელიანის ნათქვამს, თითქოს სამსახურმა ღარიბაშვილს ოჯახთან წახალისების სახით პაემანი ჩაუნიშნა, რომელიც შემდეგ დაწესებულებაში მიმდინარე ინფრასტრუქტურული სამუშაოების გამო გაუქმდა.

სამსახური ხაზს უსვამს, რომ ექსპრემიერს ის პაემანი ვერ გაუუქმდებოდა, რომელიც ჩანიშნული არც არასდროს ჰქონია.

"სპეციალური პენიტენციური სამსახური ეხმიანება საქართველოს სახალხო დამცველის, ლევან იოსელიანის განცხადებას, რომელიც მან მსჯავრდებულ ირაკლი ღარიბაშვილთან შეხვედრის შემდეგ გააკეთა; რომ თითქოს მსჯავრდებულს წახალისების სახით ჩანიშნული ჰქონდა პაემანი, რომელიც პენიტენციურ დაწესებულებაში მიმდინარე ინფრასტრუქტურული სამუშაოების გამო გაუქმდა. ცალსახად და დაბეჯითებით ვაცხადებთ, რომ არანაირი პაემანი ჩანიშნული არ ყოფილა და, შესაბამისად, ვერც გაუქმდებოდა.

აქვე, კიდევ ერთხელ განვმარტავთ, რომ დახურული ტიპის დაწესებულების (რომელშიც განთავსებულია მსჯავრდებული ღარიბაშვილი) დებულების შესაბამისად, მსჯავრდებულ ღარიბაშვილს აქვს წელიწადში ორი ხანგრძლივი და თვეში ერთი ხანმოკლე პაემნის გამოყენების უფლება და ეს ლიმიტები მას სრულად აქვს ათვისებული.

რაც შეეხება წახალისების ფორმით თავისუფლებააღკვეთილი პირისთვის დამატებითი პაემნის დანიშვნას, ეს ხდება პენიტენციური დაწესებულების დირექტორის განკარგულებით, რაც მსჯავრდებულ ღარიბაშვილის შემთხვევაში არ მომხდარა. ამდენად, ინფრასტრუქტურული სამუშაოები, რომლებიც ყველა პენიტენციურ დაწესებულებაში პერიოდულად ხორციელდება, არაფერ შუაშია. პაემანი არც ჩანიშნულა და არც გაუქმებულა," — წერს სამსახური.

სახალხო დამცველმა, ლევან იოსელიანმა საპატიმროში ექსპრემიერ ირაკლი ღარიბაშვილის მონახულების შემდეგ განაცხადა, რომ ციხის ადმინისტრაციამ ექსპრემიერს შვილებთან პაემანი რემონტის გამო გაუუქმა. 31 აგვისტოს IPN-მა გაავრცელა პენიტენციური სამსახური "გაუქმებულ პაემნებთან" დაკავშირებით, სადაც ნათქვამი იყო, რომ "არ ყოფილა პაემანი და არც გაუქმებულა".

ირაკლი ღარიბაშვილის მონახულების შემდეგ, იოსელიანი აცხადებს, რომ ექსპრემიერს "რაღაც განსაკუთრებული უსაფრთხოების მიმართ პრეტენზიები არ გამოუთქვამს". რაც შეეხება წერილებს, ამასთან დაკავშირებით საუბარი არ ჰქონიათ.