საქართველოს პატრიოტთა ალიანსის გენერალური მდივანი ირმა ინაშვილი ექსპრემიერ ირაკლი ღარიბაშვილის მე-5 წერილს გამოეხმაურა. ექსპრემიერის მიერ საპატიმროდან გამოგზავნილ პირველ წერილში სწორედ ირმა ინაშვილი და ჟურნალისტი დიტო ჩუბინიძე ფიგურირებენ.

ინაშვილი, ღარიბაშვილის მსგავსად, უფლებადამცველ ლაზარე ჯორბენაძის თვითმკვლელობის საქმის გამოძიებას მოითხოვს. ირმა ინაშვილის მოსაზრებით, ირაკლი ღარიბაშვილის სიცოცხლეს საფრთხე ემუქრება, რის გამოც მან შესაბამის ორგანოებს სათანადო რეაგირებისკენ მოუწოდა.

"რამდენადაც ჩემთვის ცნობილია, ლაზარე ჯორბენაძე აღმსარებელი და მაზიარებელი კაცი იყო, მისი თვითმკვლელობა კი იმთავითვე ეჭვს იწვევდა და უამრავ კითხვას ბადებდა.
ღარიბაშვილის წერილი ცხადყოფს, რომ ნებისმიერი კრიტიკა — ჩვენს შემთხვევაში კი სრულიად საფუძვლიანი კრიტიკა — მტრობის რანგში იყო აყვანილი მდინარაძე-კობახიძის გუნდის მიერ, რომელიც საკუთარი უცოდინარობისა და უვარგისობის გამოსწორებას კი არ ცდილობდა, არამედ არსებული პრობლემების სხვებზე გადაბრალებით იყო დაკავებული.
მაგრამ სხვებზე გადაბრალება აქ უკვე ყველაზე ნაკლები პრობლემაა. ახლა საჯაროდ დაისმება კითხვები როგორც უსაფუძვლოდ დაპატიმრებული ადამიანების, ისე — რაც უარესია — ადამიანების თვითმკვლელობების შესახებ.

პირველი კითხვა უკვე დასმულია: ის ექსპრემიერმა ირაკლი ღარიბაშვილმა დასვა და ეს კითხვა ლაზარე ჯორბენაძის თვითმკვლელობას ეხება. თუმცა მე არ გამოვრიცხავ თვითმკვლელობის იმიტაციასაც კი, რადგან, როგორც უკვე ვთქვი, ეს კაცი აღმსარებელი და მაზიარებელი იყო, რაც თვითმკვლელობის ვერსიას ეჭვქვეშ აყენებს.
ვფიქრობ, პროკურატურა ვალდებულია, დაიწყოს მოკვლევა აღნიშნულ საკითხებთან დაკავშირებით.

ამავდროულად, სრულიად ბუნებრივად მიჩნდება განცდა, რომ ღარიბაშვილის სიცოცხლე ახლა უკვე საფრთხეშია. ამიტომ საჯაროდ მივმართავ შესაბამისი კომპეტენციის ორგანოებს, რომ განსაკუთრებული დაცვის რეჟიმი აამოქმედონ ირაკლი ღარიბაშვილის მიმართ," — წერს ინაშვილი.

ირაკლი ღარიბაშვილი ციხიდან გამომგზავნილ მე-5 წერილში განმარტავს — რას გულისხმობდნენ მისთვის გამოგზავნილი წერილის პირველ პუნქტში, სადაც ნახსენებია ჟურნალისტი დიტო ჩუბინიძე, ირმა ინაშვილი და მათი აქტიურობის გამო გაჩენილი აღქმები და ეჭვები.

ირაკლი ღარიბაშვილი უფლებადამცველ ლაზარე ჯორბენაძის გარდაცვალების გარემოებების და რეალური მიზეზის გარკვევას ითხოვს. მისი თქმით, 2026 წლის თებერვალში კობახიძისა და მდინარაძის დავალებით მას აჩვენეს გაზეთ "ასავალ-დასავალში" გამოქვეყნებული ჟურნალისტ დიტო ჩუბინიძის ინტერვიუ ლაზარე ჯორბენაძესთან, სადაც ის პრემიერ კობახიძეს აკრიტიკებდა. ღარიბაშვილი ამბობს, რომ ამის შემდეგ გადასცეს გზავნილი, რომელშიც "გამოთქმული იყო აბსოლუტურად ცრუ აღქმაზე დაფუძნებული ეჭვი" — ხომ არ იდგა ის ხსენებული სტატიის უკან. მოგვიანებით კი გაიგო, რომ სტატიის რესპონდენტმა, ლაზარე ჯორბენაძემ თავი მოიკლა.

ამის გამო ღარიბაშვილი სვამს კითხვას, ნამდვილად იყო თუ არა მისი გარდაცვალება თვითმკვლელობა და რა გახდა ამის რეალური მიზეზი.

წერილის ბოლოს ექსპრემიერი იმასაც წერს, რომ "საზოგადოებაში დღემდე რჩება პასუხგაუცემელი კითხვები არაერთი ადამიანის თვითმკვლელობის ფაქტთან დაკავშირებით, რომლებსაც ადგილი ჰქონდა კობახიძე-მდინარაძის მმართველობის დროს".