პროკურატურამ აფხაზი ბლოგერის, დაურ ბუავას გარდაცვალების ფაქტზე კიდევ ორ პირს წაუყენა ბრალი.

გამოძიების ინფორმაციით, 22 აგვისტოს გ.გ.-მ ვ.კ.-ს ნარკოტიკული საშუალება მეთადონი გადასცა. ვ.კ.-ს ჩვენების თანახმად, მან ეს ნივთიერება დაურ ბუავასთან ერთად მოიხმარა. ამჟამად ვ.კ.-ს ბრალი განსაცდელში მიტოვების მუხლით აქვს წარდგენილი. პოლიციამ შეძენილი ნარკოტიკული საშუალების ნაწილი ჩხრეკისას, მისი საცხოვრებელი სახლიდან ამოიღო.

უწყების ცნობით, გ.გ.-ს პირადი და საცხოვრებელი სახლის ჩხრეკისას ამოღებულია 6,27 გრამი მეთადონი, რომელიც მას გასაღების მიზნით 9 შეკვეთად ჰქონდა დაფასოებული. რაც შეეხება ამავე საქმეზე დაკავებულ მეორე პირს — ს.ბ.-ს, მან უკანონოდ შეიძინა ნარკოტიკი გ.გ.-სგან, ხოლო თავის საცხოვრებელ სახლში 0.24 გრამ გამომშრალ მარიხუანას ინახავდა.

"საქართველოს პროკურატურამ დაურ ბუავას გარდაცვალებასთან დაკავშირებით მიმდინარე სისხლის სამართლის საქმის ფარგლებში კიდევ ორ პირს ბრალდება წარუდგინა

შინაგან საქმეთა სამინისტროს მიერ ჩატარებული გამოძიებით ამ ეტაპზე დადგენილია, რომ მიმდინარე წლის 22 აგვისტოს გ. გ.-მ, აღნიშნულ სისხლის სამართლის საქმეზე ბრალდებულ ვ. კ.-ს გადასცა ნარკოტიკული საშუალება მეთადონი (ფუძე), რისი ნაწილიც, ბრალდებულ ვ.კ.-ს ჩვენების თანახმად, 23 აგვისტოს მან და დაურ ბუავამ მოიხმარეს, ხოლო ნაწილი დაურ ბუავას საცხოვრებელი ბინის დათვალიერების შედეგად იქნა ამოღებული.

ასევე, გ.გ.-მ უკანონოდ შეიძინა და თავისივე საცხოვრებელ სახლში ინახავდა განსაკუთრებით დიდი ოდენობით — 6,27 გრამ ნარკოტიკულ საშუალება მეთადონს (ფუძე), რაც რეალიზაციის ხელშეწყობის მიზნით 9 პაკეტად დააფასოვა. სამართალდამცველებმა აღნიშნული ნარკოტიკული საშუალება ჩხრეკის შედეგად 29 აგვისტოს ამოიღეს.

ამავე საქმეზე დაკავებულმა, ნარკოტიკული დანაშაულისთვის ნასამართლევმა მეორე პირმა ს.ბ.-მ, ასევე უკანონოდ შეიძინა და მის საცხოვრებელ სახლში ინახავდა 0,24 გრამ ნარკოტიკულ საშუალება გამომშრალ მარიხუანას, რაც სამართალდამცველებმა ჩხრეკის შედეგად 29 აგვისტოს ამოიღეს," — წერს უწყება.

დაკავებულ გ. გ.-ს ბრალდება საქართველოს სისხლის სამართლის კოდექსის 260-ე მუხლის მესამე ნაწილის "ა" ქვეპუნქტით, 260-ე კვარტა მუხლის მეექვსე ნაწილის "ა" ქვეპუნქტით და 260-ე სეკუნდა მუხლის მეშვიდე ნაწილით (განსაკუთრებით დიდი ოდენობით ნარკოტიკული საშუალების უკანონო შეძენა-შენახვა, რეალიზაციის ხელშეწყობა და ნარკოტიკული საშუალების უკანონო გადაცემა) წარედგინა, რაც სასჯელის სახედ და ზომად 20 წლამდე ან უვადო თავისუფლების აღკვეთას ითვალისწინებს, ხოლო ს. ბ.-ს ბრალდება საქართველოს სისხლის სამართლის კოდექსის 273-ე მუხლით (ნარკოტიკული დანაშაულისათვის ნასამართლევი პირის მიერ ნარკოტიკული საშუალების მცირე ოდენობით უკანონო შეძენა და შენახვა) წარედგინა.

30 წლის აფხაზი ბლოგერის დაურ ბუავას გარდაცვალების შესახებ ინფორმაცია 28 აგვისტოს გავრცელა. პროკურატურამ აფხაზი ბლოგერის განსაცდელში მიტოვების ფაქტზე დაკავებულ უკრაინის მოქალაქე ვ.კ.-ს ბრალდება 30 აგვისტოს წარუდგინა. ამას გარდა, პროკურატურამ დაურ ბუავას სადარბაზოში დამონტაჟებული ვიდეოკამერის ჩანაწერიც გაასაჯაროვა, რომელშიც 23-დან 25 აგვისტომდე მონაკვეთში აღბეჭდილი რამდენიმე მონაკვეთია თავმოყრილი.

ვინ არის დაურ ბუავა?

დაურ ბუავა 2021 წლის შემოდგომიდან თბილისში ცხოვრობდა, 2022 წელს კი საქართველოს მოქალაქეობა მიიღო. სოციალურ ქსელებში გავრცელებულ ვიდეოებში მისი მთავარი გზავნილი ქართველებისა და აფხაზების შერიგება და მშვიდობიანი ურთიერთობა იყო. ის აფხაზეთის საქართველოს შემადგენლობაში დაბრუნებას ემხრობოდა, რადგან მიიჩნევდა, რომ "აფხაზისთვის ქართველზე ახლობელი არავინაა".