საქართველოს მთავრობის ინიციატივით შექმნილ საინფორმაციო პორტალს — www.ekalata.gov.ge-ს ახალი სუპერმარკეტების ქსელი "ამბარი" დაემატა. ამასთანავე, პლატფორმაზე მომხმარებლებისთვის ორი მნიშვნელოვანი ფუნქცია ამოქმედდა: დანაზოგის დათვლა და თვის განმავლობაში ფასების ცვლილების მონიტორინგი. ინფორმაციას საქართველოს კონკურენციისა და მომხმარებლის დაცვის სააგენტო ავრცელებს.

ამ დროისთვის პორტალზე წარმოდგენილია "აგროჰაბი", "ამბარი", "კარფური", "დეილი", "გუდვილი", "გვირილა", "კალათა", "ლიბრე", "მაგნიტი", "ნიკორა", "ორი ნაბიჯი", "სპარი", "უნივერსამი" და "ზღაპარი".

პორტალი მომხმარებლებს საშუალებას აძლევს, სხვადასხვა სავაჭრო ქსელში არსებული ფასები ერთ სივრცეში შეადარონ და 13 საბაზისო სასურსათო თუ 10 პირველადი მოხმარების არასასურსათო პროდუქტის შეძენისას ინფორმირებული არჩევანი გააკეთონ.

სააგენტო წერს, რომ ახალი ფუნქციონალის მიხედვით, აგვისტოს თვეში მომხმარებლების ჯამურმა დანაზოგმა 2 265.50 ლარი შეადგინა (საშუალოდ 161.82 ლარი თითო ქსელზე). ფასდაკლებული თანხების ჯამით აგვისტოს თვის ლიდერი სუპერმარკეტი "კარფური" გახდა.

სააგენტო იმასაც წერს, რომ მზადდება ekalata.gov.ge-ს მობილური აპლიკაცია iOS-ისა და Android-ისთვის. გარდა ამისა, იგეგმება სავაჭრო ქსელების გეოგრაფიული ლოკაციების ფუნქციონალის დამატება, რაც მომხმარებლებს უახლოესი სავაჭრო ობიექტების მდებარეობის მარტივად მოძიებაში დაეხმარება.