პარტია გახარია საქართველოსთვის ერთ-ერთი წევრი, თეონა აქუბარდია ქართული ოცნების პოლიტსაბჭოს განცხადებას გამოეხმაურა. მისი თქმით, განცხადებაში ჩანს რომ პარტია ერთობლივად დგება სანქციების წინაშე და გარკვეულწილად დასავლეთს იგერიებს.

"ოცნების" პოლიტსაბჭო 17 ქვეყნის საგარეო საქმეთა მინისტრებისა და EU-ს უმაღლესი წარმომადგენლის განცხადებას ეხმაურება

"მე მახსენდება "რუსული კანონის" მიღების პერიოდი, როცა ივანიშვილმა ოცნების ყველა დეპუტატს მისცა დავალება, რომ უკლებლივ ყველას ხმა ყოფილიყო ამ კანონზე, რადგან ეს ივანიშვილის წინაშე ეს კოლექტიური პასუხისმგებლობა იყო. პოლიტსაბჭოს განცხადებაც იმას აჩვენებს, რომ ისინი ერთობლივად დგებიან სანქციების წინაშე და გარკვეულწილად, იგერიებენ იმ დასავლეთს, სადაც თითქოს ორ ფეხზე ღირსებით სვლას და ევროკავშირში გაწევრიანებას ჰპირდებოდნენ ხალხს. შესაბამისად, ეს შეთქმულების თეორიები და პოლიტსაბჭოს განცხადების შათირისეული სტილი, რომელიც ერთი ერთში დუგინს იმეორებს, აჩვენებს იმ კოლექტიურ პასუხისმგებლობას, რომელიც სანქციების წინაშე უდგას ივანიშვილს და მის რეჟიმს", — განაცხადა აქუბარდიამ.

ცნობისთვის, საქართველოში ბრიტანეთის საელჩომ 17 ევროპული ქვეყნის საგარეო საქმეთა მინისტრებისა და ევროპის კავშირის უმაღლესი წარმომადგენლის განცხადება გაავრცელა. სადაც წერია, რომ განაგრძობენ საქართველოს ხელისუფლების ანტიდემოკრატიული ქმედებებისა და ადამიანის უფლებების დარღვევების მხილებას და მზად არიან გამოიყენონ მათ ხელთ არსებული მექანიზმები, თუკი საქართველოს ხელისუფლება გააგრძელებს ქვეყნის დემოკრატიისა და ადამიანის უფლებების პატივისცემის ძირის გამოთხრას.

ევროპელი მინისტრები საქართველოს ხელისუფლებას მოუწოდებენ, "დაუყოვნებლივ გაათავისუფლოს უსამართლოდ დაკავებული პოლიტიკოსები, ჟურნალისტები და აქტივისტები, გააუქმოს რეპრესიული კანონმდებლობა და ჩაერთოს ეროვნულ დიალოგში ყველა შესაბამის მხარესთან რათა მოიძებნოს გამოსავალი არსებული მდგომარეობიდან".

17 ევროპული ქვეყნის საგარეო საქმეთა მინისტრები და EU-ს უმაღლესი წარმომადგენელი საქართველოზე განცხადებას ავრცელებენ