როგორც ავსტრიული მედია წერს, ხუთშაბათს, ვენის რეგიონალურმა სასამართლომ ქართველ ექიმს წარუმატებელი პლასტიკური ოპერაციის შედეგად მიყენებული სხეულის მძიმე დაზიანების გამო 20-თვიანი ნახევრად პირობითი პატიმრობა მიუსაჯა.

11 თებერვალს, 35 წლის ექიმმა 58 წლის ქალს არალეგალურად გაუკეთა ნიკაპის პლასტიკური ოპერაცია, რასაც ისეთი გართულებები მოჰყვა, რომ პაციენტს ვენის სახელმწიფო საავადმყოფოში ინტენსიური მკურნალობა დასჭირდა.

იმ ორგანიზაციის ნომერი, რომელიც იაფფასიან და ცალსახად არალეგალურ კოსმეტიკურ პროცედურებს სთავაზობდა პაციენტებს, მან და მისმა მეგობრებმა, ე.წ. სილამაზის წვეულებაზე მიიღეს. ადგილი, სადაც 2025 წლის 11 თებერვალს ოპერაცია ჩატარდა, პროკურატურამ აღწერა, როგორც "სისხლით მოსვრილი და არაჰიგიენური" ბინა ვენის მე-3 რაიონში.

35 წლის ბრალდებული, რომელსაც, მისივე თქმით, მხოლოდ რუსეთსა და საქართველოში აქვს სამედიცინო მომსახურების გაწევის უფლება და მისი თვიური შემოსავალი ამ ქვეყნებში "ათიდან თხუთმეტი ათას დოლარამდე" მერყეობს, ვენაში სპეციალურად ამ ოპერაციისთვის ჩაფრინდა. პროცედურისას ქალს მოულოდნელად დაეწყო ძლიერი სისხლდენა და შეშუპება, ამიტომ, იქ მყოფმა პაციენტის დამ, ექიმთან ერთად გამოიძახა სასწრაფო, რომელმაც 58 წლის ქალი დაუყონებლივ გადაიყვანა ვენის სახელმწიფო საავადმყოფოში. აქ მას მთელი ღამის განმავლობაში ინტესიური მკურნალობა უტარდებოდა.

ბრალდებულმა ვენის სასამართლოში დანაშაული სრულად აღიარა

ქართველმა ექიმმა პირველივე დაკითხვისას აღიარა ბრალი. "ეს ჩემი ცხოვრების ყველაზე დიდი შეცდომა იყო" — თქვა მან სასამართლო პროცესზე. თუმცა, მისმა ადვოკატებმა დანაშაულის ჩადენის ნებისმიერი წინასწარი განზრახვა გამორიცხეს, რის დამტკიცებასაც ბრალდების მხარე ცდილობდა. დაცვის მხარე მიუთითებდა, რომ დაზარალებულმა საკუთარი ნებით გადაწყვიტა პროცედურის ჩატარება და მას ქუჩაში თავს არავინ დასხმია.

დამოუკიდებელმა ექსპერტმა დაამოწმა, რომ ექიმმა ოპერაცია სწორად ჩაატარა, მაგრამ საცხოვრებელ ბინაში არსებული გარემო სრულიად შეუსაბამებო იყო ამგვარი პროცედურისთვის. მეტიც, თუკი ბრალდებული ოპერაციას თანაშემწის დახმარებით გააკეთებდა — და არა დამოუკიდებლად — გართულებები შესაძლოა მართვადი ყოფილიყო. გარდა ამისა, 58 წლის ქალს არანაირი წერილობითი სამართლებრივი თანხმობა არ წარუდგენია პროცედურისთვის.

საბოლოოდ, ნაფიცმა მსაჯულებმა ქართველ ექიმს სხეულის მძიმე დაზიანების გამო 20-თვიანი პატიმრობა მიუსაჯეს. აქედან 16 თვე პირობითი სასჯელით განისაზღვრა. მსაჯულებმა დაასკვნეს, რომ ექიმს ნამდვილად არ ჰქონდა ქალის დაზიანება განზრახული, ამასთან, გულწრფელმა აღიარებამ და მისი ცხოვრების წესმაც ასევე იმოქმედა ვერდიქტზე. ვინაიდან ბრალდებულმა უკვე გაატარა ოთხი თვე წინასწარ პატიმრობაში, იგი საპატიმრო დაწესებულებას მალევე დატოვებს.

ვენის კრიმინალურმა საგამოძიებო დეპარტამენტმა სხვა შესაძლო მსხვერპლების მოსაძიებლად გამოძიებაც ჩაატარა, თუმცა უწყებას ექიმისთვის დამატებითი ბრალდება არ წარუდგენია.