ერთი წლის წინ ანჯელინა ჯოლის ცხოვრებაში ბევრი რამ შეიცვალა, უფრო სწორედ მოხდა ის, რამაც გავლენა სხვა ყველაფერზე იქონია - ჯოლი და ბრედ პიტი დაშორდნენ.

გასული წლის 19 სექტემბერს, მსოფლიო პრესის ყურადღება სწორედ ბრანჯელინას გარშემო იყო მიმართული, რომლებმაც თქვეს, რომ ერთად აღარ იქნებოდნენ.

ჯოლიმ კიდევ ერთხელ გადაწყვიტა, გულახდილი ყოფილიყო. მსახიობმა ჟურნალ People-ს მორიგი ინტერვიუ მისცა და განქორწინების პროცესი, რთული პერიოდი და ტრავმები დეტალურად გაიხსენა.

"ძალიან რთული პერიოდი მქონდა, იყო ემოციური აღმასვლებისა და მიწაზე დანარცხების პერიოდი, ვცდილობდი ძლიერი ვყოფილიყავი. რა თქმა უნდა ყველას გვაქვს რთული პერიოდები, მაგრამ როდესაც დედა ხარ, პირველ რიგში შვილებზე ფიქრობ. ახლა მათ ასე ვთქვათ, რთული ასაკი აქვთ, როდესაც პიროვნებებად ყალიბდებიან და ამ ფონზე ყველაფერი მეორეხარისხოვანია", - ამბობს ინტერვიუში ანჯელინა ჯოლი.

ფოტო: GEORGE PIMENTEL/WIREIMAGE

"დაშორების შემდეგ მთავარ აქცენტს ბავშვებზე ვაკეთებდი, არ ვმუშაობდი, ვიყავი დიასახლისი, რადგან მათ სახლში ვჭირდებოდი. დაშორების შემდეგ თითქოს ყველაფერი გაჩერდა. მათ [ბავშვებს] ხშირად ვესაუბრებოდი, რადგან ვთვლი რომ ასეთ დროს ეს მნიშვნელოვანია. ვფიქრობ, რომ უკვე ვისწავლეთ და მზად ვართ ამ ყველაფრის შემდეგ საჯაროდ გამოვიდეთ", - იხსენებს მსახიობი.

ფოტო: ALEXEI HAY/NETFLIX

ჯოლი კიდევ ერთხელ უსვამს ხაზს იმასაც, რომ ერთ წლიანი პაუზა საკმარისი იყო ყველაფრის გასაანალიზებლად და ახალი ცხოვრების დასაწყებად.

სტრესის, კრიზისისა და ხანგრძლივი პაუზის შემდეგ ჯოლიმ ცოტა ხნის წინ თავისი კიდევ ერთი სარეჟისორო ნამუშევარი, First They Killed My Father წარადგინა სხვადასხვა ფესტივალებზე, დაადასტურა ისიც, რომ სამსახიობო კარიერას უბრუნდება.

"ამ ეტაპზე ვაპირებ რეჟისორობას ცოტა ხნით შევეშვა და სამსახიობო კარიერას დავუბრუნდე. ახლა აქტიურად ვმუშაობთ Maleficent-ის მეორე ნაწილზე", - ამბობს ჯოლი.

ასევე წაიკითხეთ:

ანჯელინა ჯოლის პირველი, გულწრფელი ინტერვიუ ბრედ პიტთან დაშორების შემდეგ