აშშ-ს პრეზიდენტად დონალდ ტრამპის ხელახალი არჩევის შემდეგ, ჯეიმს კამერონი ახალი ზელანდიის მოქალაქე ხდება. მისი თქმით, ტრამპის მმართველობის ქვეშ მყოფი ამერიკა ყველანაირი ღირებულებებისგან დაცლილია. კამერონი ახალ ზელანდიაში გადასვლაზე დიდი ხანია საუბრობს. ტრამპის ამჟამინდელი პრეზიდენტობა, რომელსაც ოსკაროსანი რეჟისორი "საშინელებას" ეძახის, ერთგვარი კატალიზატორი გახდა და მისი გეგმები დააჩქარა.

"ვფიქრობ, ეს საშინელებაა… ჩემთვის ეს ყველა წესისგან გადახვევაა. ამერიკა არაფერია, თუ ის არ იცავს იმას, რასაც ისტორიულად იცავდა. ამერიკის იდეა კარგავს თავის რეალურ მნიშვნელობას და ეს ადამიანები საკუთარი ინტერესების დასაცავად პროცესს ძალიან აჩქარებენ. არ ვიცი აქ [ახალ ზელანდიაში] თავს უფრო დაცულად ვგრძნობ თუ არა, მაგრამ მე უბრალოდ აღარ მინდა, რომ ყოველ დღე მის [ტრამპის] შესახებ ინფორმაცია გაზეთის პირველ გვერდზე ვნახო. ის უბრალოდ ავადაა. ახალი ზელანდიის გაზეთებში არის რაღაც სასიამოვნო — სხვა თუ არაფერი, ტრამპის შესახებ მესამე გვერდზე დაწერენ... მე უბრალოდ აღარ მინდა ამ კაცის სახის დანახვა გაზეთის პირველ გვერდზე. ამერიკაში ეს გარდაუვალია, ეს იგივეა განუწყვეტლივ უყურებდე ავტოკატასტროფას" — უპასუხა 70 წლის კინორეჟისორმა კითხვაზე, თუ რამდენად აწუხებდა მას ტრამპის მეორე ვადით არჩევა.

რეჟისორი კანადაში გაიზარდა. ის ზელანდიელი და კანადელი ხალხის ქცევაში უამრავ მსგავსებას ხედავს, თუმცა იმასაც აღიარებს, რომ ზელანდია "ცოტათი უკეთესია". ახალი ზელანდიის მოქალაქეობის მიღება რეჟისორისთვის ბევრს ნიშნავს. როგორც მან თქვა, ეს არის ის, რისთვისაც მთელი ცხოვრება იშრომა. კამერონის აზრით, ზელანდიელ ხალხს ურთიერთ პატივისცემის უნარი გამოარჩევს, ყველა ადამიანი თანასწორია და ეს ზუსტად ისეთი გარემოა, რომელშიც რეჟისორს სურს, მისმა შვილებმა იცხოვრონ. მეტიც, ის გეგმავს, სამომავლოდ ყველა ფილმი ველინგტონში გადაიღოს.