"ლიმიტირებული უფლებამოსილებები [PACE-ში] ჩვენთვის არანაირი წუხილის საფუძველი არ არის. იანვრიდან აპრილამდე არ ვგეგმავდით რომელიმე თანამდებობაზე პრეტენზიის გაცხადებას, სახლში უამრავი საქმე გვაქვს", — ამის შესახებ ევროსაბჭოში ქართული ოცნების დელეგაციის ხელმძღვანელმა, თეა წულუკიანმა ევროსაბჭოს საპარლამენტო ასამბლეის (PACE) რეზოლუციაზე თქვა. მისი თქმით, რეზოლუციაში "წითელი ხაზი ისაა, რომ იქ წერია ახალი არჩევნები".

"ლიმიტირებული უფლებამოსილებები, რომ კი, ხართ უფლებამოსილი და ლეგიტიმური წევრები, მაგრამ ვერ იქნებით ასამბლეის ვიცეპრეზიდენტი, ან კომიტეტის ხელმძღვანელი, ან სადღაც მომხსენებელი, ეს პრინციპში პრაქტიკაში დიდს არაფერს ჩვენთვის არ ნიშნავს და ვერ დაგიმალავთ, რომ ჩვენთვის არანაირი წუხილის საფუძველი არ არის, იმიტომ, რომ იანვრიდან აპრილამდე ჩვენი დელეგაციის არცერთი წევრი არც კი ვგეგმავდით რომელიმე თანამდებობაზე პრეტენზიის გაცხადებას, ან რომელიმე მონიტორინგში მონაწილეობას, იმიტომ, რომ ჩვენ სახლში უამრავი საქმე გვაქვს...

ამიტომ, ეს ეწერება თუ არ ეწერება, ამის ცვლილებაზე და ამაზე მსჯელობაზე ენერგიას ჩვენ ამ დღეებში საერთოდ არ ვხარჯავთ, იმიტომ რომ ეს არაფერი არ არის, სინამდვილეში სხვა დათქმებია პრობლემატური და განსაკუთრებით ისაა წითელი ხაზი, რომ წერია ახალი არჩევნები" – თქვა ევროსაბჭოში ქართული ოცნების დელეგაციის ხელმძღვანელმა თეა წულუკიანმა ევროსაბჭოს საპარლამენტო ასამბლეის (PACE) რეზოლუციაზე.

მანამდე ერთიანობა ნაციონალური მოძრაობის ლიდერმა, თინა ბოკუჩავამ განაცხადა, რომ ევროსაბჭოში გუშინდელი კომიტეტის სხდომა ძალიან მძიმე იყო თეა წულუკიანისთვის, რადგან ევროსაბჭოს საპარლამენტო ასამბლეის წევრებმა მას სთხოვეს, რომ დაეტოვებინა დარბაზი.

"მოუწიათ ევროსაბჭოს წევრებს, შეეხსენებინათ, რომ ეს ქართული ოცნების ერთპარტიული პარლამენტი არ არის და ევროსაბჭოს საპარლამენტო ასამბლეაა. ბოლოს სთხოვეს კიდეც, რომ დაეტოვებინა დარბაზი”, — თქვა ბოკუჩავამ ტვ პირველის ჩართვაში.

შეგახსენებთ, რომ 29 იანვარს კენჭი ეყრება ევროსაბჭოს რეზოლუციის ტექსტს, რომელშიც საუბარია ქართული ოცნებისათვის ვადამდელი არჩევნების დანიშვნისა და პოლიტპატიმრების გათავისუფლებაზე, ასევე, ოცნების დელეგატებზე შეზღუდვების დაწესებაზე.