"დავადასტურეთ, რომ საქართველოსთვის ამ პლატფორმის ["3+3"] კარი ყოველთვის ღია რჩება. ვიმედოვნებთ, რომ დროთა განმავლობაში ქართველი მეზობლები შეძლებენ შემოუერთდნენ მის მუშობას", — განაცხადა ლავროვმა "3+3" საკონსულტაციო რეგიონული პლატფორმის მესამე შეხვედრის დასასრულს.

"ჩვენ გვაქვს კონტაქტები თბილისთან. გვაქვს ინტერესების სექცია შვეიცარიის საელჩოში. იქ მუშაობენ ჩვენი დიპლომატები, რომლებსაც, საჭიროებისამებრ, აქვთ შესაძლებლობა განიხილონ აქტუალური საკითხები, პირველ რიგში ვაჭრობის, ტურიზმის სფეროებში, ხალხთა შორის კონტაქტები უშუალოდ საქართველოს შესაბამის ორგანოებთან", — აღნიშნა ლავროვმა.

რია ნოვოსტი წერს, რომ სამხრეთ კავკასიასა და ახლო აღმოსავლეთში თანამშრომლობის შესახებ კონსულტაციების ექვსმხრივი (რუსეთი, თურქეთი, ირანი, აზერბაიჯანი, სომხეთი და საქართველო) ფორმატის დაწყება 2020 წლის ბოლოს აზერბაიჯანისა და თურქეთის პრეზიდენტების, ილჰამ ალიევის და რეჯეფ თაიფ ერდოღანის მიერ იყო შემოთავაზებული. გამოცემა წერს, რომ საქართველო არაერთხელ იყო მიწვეული ამ ფორმატში მონაწილეობის მისაღებად. 2021 წლის დეკემბერში მოსკოვში გაიმართა პლატფორმის პირველი შეხვედრა. ბოლოს საგარეო საქმეთა მინისტრები ამ ფორმატში 2023 წლის ოქტომბერში თეირანში შეხვდნენ. როგორც თურქეთის საგარეო საქმეთა მინისტრმა, ჰაკან ფიდანმა განაცხადა, მიმდინარე შეხვედრაში სავარაუდოდ ხუთი მინისტრი მიიღებს მონაწილეობას, რადგან საქართველო კვლავ არ იქნება წარმოდგენილი ღონისძიებაზე.