ოკუპირებული აფხაზეთისა და სამხრეთ ოსეთის თვითგამოცხადებული რესპუბლიკების ლიდერებმა — ასლან ბჟანიამ და ალან გაგლოევმა რუსეთის პრეზიდენტ ვლადიმირ პუტინს დაბადების დღე მიულოცეს. ამის შესახებ ეხო კავკაზა წერს.

რუსეთის ლიდერს 7 ოქტომბერს 72 წელი შეუსრულდა.

ბჟანიას მილოცვაში საუბარია, რომ პუტინი არის "გამოჩენილი და ავტორიტეტული მსოფლიო ლიდერი ისტორიის ამჟამინდელ ეტაპზე".

"თქვენი ხელმძღვანელობით რუსეთის ფედერაციაში მართლაც ეპოქალური ცვლილებები მოხდა, რომელმაც გარდაქმნა მოქალაქეების ცხოვრება. ქვეყანამ მიაღწია დიდ სიმაღლეებს და განსაკუთრებული ადგილი დაიკავა საერთაშორისო ასპარეზზე. თქვენი საქმიანობა სახელმწიფოს და მთავრობის პოსტზე რუსეთის გაძლიერების ისტორიაა, რომელიც ფუნდამენტურ ღირებულებებს ეფუძნება", — ნათქვამია ბჟანიას მილოცვაში.

ბჟანიას თქმით, აფხაზი ხალხი აფხაზეთის დამოუკიდებლობის აღიარებაში, მშვიდობის შენარჩუნებასა და რესპუბლიკის უსაფრთხოების უზრუნველყოფაში პუტინის უზომოდ მადლიერია.

ალან გაგლოევმა აღნიშნა, რომ ეს "მნიშვნელოვანი თარიღი პუტინის განსაკუთრებული წვლილის შეხსენებაა რუსეთის აღორძინების საქმეში, რაც სამართლიანად ასოცირდება მის ნაყოფიერ საქმიანობასთან".