დავით ზალკალიანმა უარყო ბოლო დღეებში მედიაში გავრცელებული ინფორმაცია იმასთან დაკავშირებით, რომ ის აშშ-ში საქართველოს ელჩის თანამდებობას ტოვებს — გავრცელებულ ხმებს ზალკალიანმა არასერიოზული უწოდა.

"ძალიან არასერიოზულია ეს ყველაფერი, არც ვაპირებ ამაზე სერიოზული კომენტარის გაკეთებას. ყოველთვის ვიყავი ჩემი ქვეყნის სამსახურში და რა თქმა უნდა, არცერთმა პოლიტიკურმა ძალამ, ჩვენმა ოპონენტებმა არ უნდა მისცენ თავს იმის უფლება, ჩემი სახელი იქნება თუ სხვისი, გამოიყენონ საკუთარი პოლიტიკური ინტერესებისთვის", — განაცხადა დავით ზალკალიანმა

ელჩი გამოეხმაურა ჯო ბაიდენის მიღებაზე საქართველოს პრემიერ-მინისტრის, ირაკლი კობახიძის, მიწვევის გაუქმების ფაქტსაც და აღნიშნა, რომ ეს სტრატეგიულ პარტნიორებს შორის ურთიერთობას არ შეესაბამება.

"ძალიან ვწუხვარ, რომ ამგვარ ფაქტს ჰქონდა ადგილი, რა თქმა უნდა, ეს არავითარ შემთხვევაში არ შეესაბამება სტრატეგიულ პარტნიორებს შორის ურთიერთობას და მე ამაზე მექნება ძალიან გულწრფელი საუბრები ჩვენს ამერიკელ მეგობრებთან. რა თქმა უნდა, სტრატეგიულ პარტნიორებს შორისაც არის გაუგებრობები, მაგრამ მე ვფიქრობ, რომ ამ პრობლემას აუცილებლად სჭირდება გულწრფელი საუბარი, დიალოგი და სწორი შეფასება, იმისთვის რომ მომავალში თავიდან ავიცილოთ სტრატეგიულ პარტნიორებს შორის არსებულ ურთიერთობებში", — აღნიშნა ზალკალიანმა