თბილისში, ჭოველიძის ქუჩაზე მცხოვრებმა ერთმა მოქალაქემ On.ge-ის უთხრა, რომ ხანძარი მთაწმინდის ფერდობზე, ვერის სასაფლაოს ზედა მხარეს, დასახლებულ უბანთან ახლოსაა, თუმცა მეხანძრეები ასვლას ვერ ახერხებენ და თავად მოსახლეობა, საპატრულო პოლიციასთან ერთად, ცდილობს ცეცხლის ჩაქრობას.

საგანგებო სიტუაციების სამსახურის ინფორმაციით, ცეცხლი უკიდია ტყის მასივს მიუვალ ადგილზე, თუმცა მეხანძრეები მობილიზებულნი არიან და ყველა შესაძლო საშუალებით ცდილობენ ცეცხლის ჩაქრობას.

ფოტო: ანი ხოშტარია / On.ge

რაც შეეხება ვერტმფრენის გამოყენებას, საგანგებო სიტუაციების სამსახურში აცხადებენ, რომ მათ ვერტმფრენი საკუთრებაში არ აქვთ და საჭიროების შემთხვევაში იყენებენ სასაზღვრო პოლიციის ვერტმფრენებს.

ვერის სასაფლაოსთან იმყოფება On.ge-ის ჟურნალისტი, რომელიც ამბობს, რომ ხანძარი რამდენიმე ასეულ მეტრშია და პოლიცია მოქალაქეებს აღნიშნული მიმართულებით არ უშვებს.

ცეცხლი მთაწმინდის ფერდობზე, დაახლოებით, 22 საათზე გაჩნდა.