უკვე მესამე დღეა, თბილისში, პარლამენტის წინ შუქრუთელების აქცია გრძელდება. აქციის მონაწილეები ჯორჯიან მანგანეზის საქმიანობის შედეგად სოფელ შუქრუთისთვის მიყენებული ზარალის ანაზღაურებას და პროცესში ცენტრალური ხელისუფლების ჩართვას ითხოვენ.

დღეს მაღაროელების უწყვეტი პროტესტის 186-ე და შიმშილობის მე-14 დღეა. გაფიცულებიდან ხუთ მათგანს პირი აქვს ამოკერილი.

პროტესტს მმართველი პარტიიდან რამდენიმე პოლიტიკოსი გამოეხმაურა. საქართველოს პრემიერ-მინისტრმა ირაკლი კობახიძემ აღნიშნა, რომ კომპანიის თანამშრომლებს და აქციის ორგანიზატორებს ათობით ათასი ლარის კომპენსაცია აქვთ აღებული.

"ჩვენ მოვიძიეთ ინფორმაცია ამ ადამიანებთან დაკავშირებით და ვინც არიან პროტესტის ორგანიზატორები, თითოეულ მათგანს ათობით ათასი ლარის კომპენსაცია აქვთ მიღებული კომპანიისგან. თუ რამე დამატებით არის საჭირო კომპანიისგან, ალბათ მოლაპარაკებები ამასთან დაკავშირებით წარიმართება. ეს არის ის ინფორმაცია, რაც გვაქვს. ჯერჯერობით კომპანიის საქმეა მოლაპარაკებების წარმოება" — აღნიშნა კობახიძემ.

პრემიერ-მინისტრის ბრალდებებს NEWS.On.ge-სთან სოფელ შუქრუთის მცხოვრებმა გიორგი ბიწაძემ უპასუხა. ბიწაძე ერთ-ერთია, რომელსაც უკვე 12 დღეა პროტესტის ნიშნად პირი აქვს ამოკერილი.

ბიწაძის თქმით, კომპანიამ რამდენიმე მათგანს გადაუხადა მხოლოდ ავანსი გადაუხადა. მაგალითად, პირადად მას 23 ათასი ლარი აქვს აღებული და ეს მაშინ, როცა მისი სახლი სრულად დანგრეულია.

დღეს, 14 სექტემბერს შუქრუთელებმა ოფიციალური განცხადებაც გაავრცელეს, სადაც ირაკლი კობახიძისა და შალვა პაპუაშვილი განცხადებებს უპასუხეს. შუქრუთელებმა ასევე საზოგადოებას სოლიდარობისკენ მოუწოდეს.

NEWS.On.ge განცხადებას სრულად გთავაზობთ:

"გვინდა, გამოვეხმაუროთ პარლამენტის თავმჯდომარისა და პრემიერ-მინისტრის მიერ გუშინ გაკეთებულ განცხადებებს ჩვენს პროტესტთან დაკავშირებით. ჭიათურიდან აქ სწორედ იმიტომ ჩამოვედით და რამოდენიმე მონაწილემ პროტესტის უკიდურეს ზომას იმიტომ მიმართა, რომ ცენტრალური ხელისუფლება არ გვისმენს და ჩვენს თხოვნას ყურად არ იღებს.

როგორც იცით, 14 მარტიდან უწყვეტი საპროტესტო აქციას ვმართავთ ჭიათურაში, კოროხნალის და შუქრუთის მაღაროებთან. მთელი ამ 6 თვის განმავლობაში არც ცენტრალური და არც ადგილობრივი ხელისუფლებიდან ჩვენთან არავინ მოსულა. ახლაც, როცა თბილისში, პარლამენტის შენობის წინ ვართ, პარლამენტის თავჯდომარე და მთავრობის მეთაური განცხადებებს ისე აკეთებენ, რომ წარმომადგენელიც კი არ გამოუგზავნიათ ამბის გასაგებად.

სამაგიეროდ, იმეორებენ ჯორჯიან მანგანეზის მიერ გავრცელებულ ინფორმაციას, რომ თითქოს კომპენსაცია სრულად გვაქვს მიღებული, რაც სიცრუეა და მზად ვართ, ეს დოკუმენტურად დავამტკიცოთ.

ამიტომ, ვითხოვთ, ცენტრალური ხელისუფლების ჩართულობას საკითხის გადაწყვეტის პროცესში.

ჩვენ გვაქვს ერთადერთი მოთხოვნა – ჯორჯიან მანგანეზმა მიყენებული ზიანი შეაფასებინოს სასამართლო ექსპერტიზის ბიუროს და დაზარალებულ ოჯახებს სამართლიანი კომპენსაცია გადაგვიხადოს.

ეს ვალდებულება კომპანიამ იკისრა 2021 წელს, ჩვენთან გაფორმებული მემორანდუმით, რომელიც შემდეგ დაარღვია, არ შეასრულა და იმ თანხებს, რაც მხოლოდ რამდენიმე დაზარალებულ ოჯახს ავანსის სახით ჩაურიცხა, სრულად გაცემულ კომპენსაციას ეძახის. სამწუხაროდ, მოშიმშილეთა ჯანმრთელობის მდგომარეობა ყოველდღიურად მძიმდება. ისინი არ აპირებენ პროტესტის შეწყვეტას სამართლიანი მოთხოვნის. დაკმაყოფილებამდე.

მივმართავთ პარლამენტს, მთავრობას, სახალხო დამცველს, მოგვისმინონ და ყველაფერი გააკეთონ ჩვენი უფლებების დასაცავად, რადგან, მიუხედავად იმისა, რომ სრულიად მართლები ვართ, ჯორჯიან მანგანეზი იმდენად გავლენიანია, უფლებების დაცვას ვერ ვახერხებთ სასამართლოშიც კი.

ამასთან , ყველა იმ ადამიანს, ვინც მხარს უჭერს, რომ ამ ქვეყანაში დაცული იყოს ადამიანის უფლებები და არ ვიჩაგრებოდეთ, ვთხოვთ, ორშაბათს, 16 სექტემბერს, 19:00 საათზე, პარლამენტთან მოვიდნენ სოლიდარობის აქციაზე", — ნათქვამია განცხადებაში.

ამავე თემაზე: