მოკლედ: წუხელ, ჭავჭავაძის გამზირზე, ადმინისტრაციული წესით, პოლიციამ 11 ადამიანი დააკავა, 5 მათგანი ხელწერილის საფუძველზე უკვე გათავისუფლდა.

  • ინფორმაცია On.ge-ის შინაგან საქმეთა სამინისტრომ დაუდასტურა.

დეტალები: ჭავჭავაძის გამზირზე, მოქალაქეთა დაკავება მას შემდეგ დაიწყო, რაც ბლოგერი და რუსული კანონის მოწინააღმდეგე უჩა აბაშიძე გასულ ღამეს დააკავეს.

  • ვიდეო კადრებში ჩანს, რომ პოლიცია, მშვიდობიანი მოქალაქეთა დაკავების მიზნით, მიმართავდა ძალას.
  • პოლიციამ დააკავა ტელეკომპანია მთავარის გადაცემა "შენი დილის" თანაწამყვანი, ლევან აბდუშელიშვილიც თუმცა, ხელწერილის საფუძველზე გაათავისუფლეს.

კონტექსტი: პოლიცია უჩა აბაშიძის საცხოვრებელ სახლში 9 მაისის საღამოს, 20:00 საათის შემდეგ შევიდა ჩხრეკის მიზნით, თუმცა მას არ მისცეს უფლება, გამოეყენებინა ტელეფონი და დაჰკავშირებოდა ადვოკატს.

  • უჩა აბაშიძესთან არ უშვებდნენ არც ოჯახის წევრებს. არ შეუშვეს არც ადვოკატი, რომელიც მალევე მივიდა ადგილზე მას შემდეგ, რაც მედიით გახდა ცნობილი აბაშიძის სახლში პოლიციელთა მისვლის შესახებ.
  • გამოძიება მიმდინარეობს მუხლით, რომელიც იარაღის უკანონო შეძენა-შენახვას გულისხმობს.

მსგავსი: უჩა აბაშიძის სახლში ამოღებული იარაღი, ძირითადად, სათამაშოა, ტყვიები კი პლასტმასის — ლია თოდუა

დღეს, 10 მაისს, სახალხო დამცველის აპარატმა განაცხადა, რომ გასული ღამის განმავლობაში, 8 პირი მოინახულეს, მათ შორის ბლოგერი უჩა აბაშიძე, რომელიც პოლიციის მხრიდან ფსიქოლოგიურ ზეწოლასა და სიტყვიერ შეურაცხყოფაზე მიუთითებდა.

გაიგე მეტი: უჩა აბაშიძე პოლიციელების მხრიდან ფსიქოლოგიურ ზეწოლასა და სიტყვიერ შეურაცხყოფაზე საუბრობს — სახალხო დამცველის აპარატი