მოკლედ: პარტია გახარია საქართველოსთვის დეპუტატებმა ოფიციალური წერილით მიმართეს საქართველოს გენერალურ პროკურორს, ირაკლი შოთაძეს, რომ დროულად დაიწყონ გამოძიება 151-ე, მუქარის მუხლით.

  • პარტიის წევრმა ანი ბუჩუკურმა ტელეკომპანია პირველის ეთერში განაცხადა, რომ მათი გუნდის საკრებულოს წევრების უმრავლესობას დაურეკეს და დაემუქრნენ.

დეტალები: ბუჩუკურის თქმით, პროკურატურაში, კონკრეტული მტკიცებულებებით, ე.წ. სქრინებით შეიტანეს განცხადება თუ როგორ ხდება ქართულ ოცნებასთან აფილირებული სოციალური მედიის საშუალებით, ადამიანების იდენტიფიცირება იმ მიზნით, რომ შემდგომ გაუსწორდნენ, დაემუქრონ, შეურაცხყოფა მიაყენონ და ქუჩაში დახვდნენ.

  • "დაუსჯელი არ დარჩება არავინ, დანაშაულს აქვს ხანდაზმულობა და თითოეული ადამიანის სისხლის სამართლებრივი პასუხისმგებლობა ადრე თუ გვიან აუცილებლად დადგება", — განაცხადა ბუჩუკურმა.
  • მისივე თქმით, არ აქვს იმედი, რომ პროკურატურა, ირაკლი შოთაძის ხელმძღვანელობით, გამოძიებას დაიწყებს.

კონტექსტი: ბოლო დღეების განმავლობაში, აქტივისტებისა და კანონის მოწინააღმდეგეების ტელეფონებზე არაერთი ზარი დაფიქსირდა, როგორც საქართველოს, ასევე უკრაინასა და სხვა ქვეყნებიდან.

  • უცნობი პირები სიტყვიერ შეურაცხყოფას აყენებენ ადრესატებს და ემუქრებიან.