რა ხდება: 2024 წლის 30 აპრილის აქციის დარბევის ღამეს, როგორც საჯაროდ გავრცელებული კადრებიდან ირკვევა, და როგორც ამ კადრებიდან გამომდინარე, ოჯახი ადასტურებს, სამართალდამცავების ეფექტიანი კონტროლის ქვეშ ფიზიკურ ძალადობას დაექვემდებარა მოქალაქე გელა ნადირაძე, — აცხადებს საქართველოს ახალგაზრდა იურისტთა ასოციაცია (საია).

დეტალები: ორგანიზაცია აცხადებს, რომ:

  • მხოლოდ 2 მაისის დღის მეორე ნახევარში ეცნობა ოჯახს ინფორმაცია, რომ პირი გადაყვანილი იყო წმინდა მიქაელ მთავარანგელოზის სახელობის საავადმყოფოში;
  • აღენიშნებოდა ნეკნების მძიმე დაზიანება.
  • ოჯახის წევრებს საავადმყოფოს წარმომადგენლებმა სატელეფონო საუბრისას განუცხადეს, რომ დაზარალებული პოლიციის მიერ იქნა საავადმყოფოდან გადაყვანილი, ხოლო, ადგილზე მისულებს კი, განუცხადეს, რომ გელა ნადირაძე გაწერილია საავადმყოფოდან დღეს, თუმცა, პოლიციას იგი არ წაუყვანია.

საია მოუწოდებს სპეციალურ საგამოძიებო სამსახურს: გელა ნადირაძის ადგილსამყოფლის, მისი მდგომარეობისა და დაზიანებების მიყენების გარემოებების ირგვლივ არსებული ბუნდოვანებიდან გამომდინარე, მყისიერად დაიწყოს გამოძიება გელა ნადირაძის საქმეზე, ჩაატაროს ყველა საჭირო მოქმედება, მათ შორის, დაზარალებულის ადგილსამყოფლის დადგენის მიზნით და აცნობოს საზოგადოებას შესაბამისი
ინფორმაცია.

  • იმ შემთხვევაში, თუ გელა ნადირაძემ მიიღო დაზიანებები პოლიციის ეფექტიანი კონტროლის ქვეშ, საჭიროა შესაბამისი საგამოძიებო მოქმედებები მყისიერად დაიწყოს, და არ მოხდეს დაზარალებულის დაშინება ან მასზე სხვაგვარი ზემოქმედება.