რა ხდება: საქართველოს პრემიერ-მინისტრი, ირაკლი კობახიძე საჯარო სიტყვით მიმართვისას არ მიესალმა საქართველოს პრეზიდენტს, სალომე ზურაბიშვილს. ისინი ერთად იმყოფებიან ვაზიანში, სადაც საქართველოს თავდაცვის ძალების 33-ე წლისთავთან დაკავშირებული საზეიმო ღონისძიება იმართება.

• ირაკლი კობახიძემდე ჯარს სალომე ზურაბიშვილმა მიმართა — პრეზიდენტმა, საქართველოს სამხედრო ძალების უმაღლესმა მთავარსარდალმა.

კობახიძე: "ჩემს მისალმებაში შეგნებულად არ მოვიხსენიე წინა გამომსვლელი, და ქართულ ჯარს არ ვაკადრებ, გამოვეხმაურო მის პოლიტიკურ განცხადებებს, რომელიც სრულიად შეუფერებელი იყო დღევანდელი დღისთვის და პრეზიდენტის მაღალი თანამდებობისთვის. კონსტიტუციის წინაშე ფიცის გატეხისა და ქვეყნის ღალატისთვის ღმერთის წინაშე აგებს ყველა პასუხს", — თქვა მან.

• მანამდე ის მიესალმა პარლამენტის თავმჯდომარეს, თბილისის მერს, თავდაცვის ძალების მეთაურს, გენერლებს, ოფიცრებს, სერჟანტებს, რიგითებსა და კაპრალებს.

კონტექსტი: საქართველოს ღიად ანტიდასავლური პრემიერ-მინისტრის, ირაკლი კობახიძის ეს რეაქცია მოჰყვა პრეზიდენტის სიტყვას, რომელშიც მან ისაუბრა სტრატეგიული პარტნიორების როლზე ქართული ჯარის გასაძლიერებლად.

• "დღეს ვიღაცებს სურთ, რომ ჩვენი 30 წლიანი მოკავშირეები და პარტნიორები წარმოაჩინონ, როგორც რაღაც უცნობი და უსახო ომის პარტიად, რომელიც საქართველოს ავანტიურასა თუ კონფრონტაციაში იწვევს, ეს არის დიდი ტყუილი და მავნებლობა", — განაცხადა პრეზიდენტმა.

სალომე ზურაბიშვილი: "საქართველოს ჯარმა კარგად იცის, თუ ვინ არის მტერი და ვინ მოყვარე, ვინ ცდილობდა ჩვენს განადგურებას და ვინ დაგვეხმარა ჩამოგვეყალიბებინა თანამედროვე თავდაცვის ძალები.

• საქართველოს ჯარმა ყველაზე კარგად იცის, რატომ ვიბრძოდით საერთაშორისო მისიებში, რამეთუ ჩვენი წვლილი და ღირსეული კონტრიბუცია შეგვეტანა გლობალურ უსაფრთხოებაში.
• რამდენი ჩვენი ჯარისკაცი ღირსეულად ემსხვერპლა ამ საკაცობრიო მიზანს- ტერორიზმთან ბრძოლას.
• დღეს ვიღაცებს სურთ, რომ ჩვენი 30-წლიანი მოკავშირეები და პარტნიორები წარმოაჩინონ, როგორც რაღაც უცნობი და უსახო ომის პარტიად, რომელიც საქართველოს ავანტიურასა თუ კონფრონტაციაში იწვევს, ეს არის დიდი ტყუილი და მავნებლობა.
• ჩვენ და პირველ რიგში, თქვენ, ყველამ კარგად ვიცით, არა მხოლოდ უკანასკნელი 30 წლის მაგალითზე, თუ ვინ არის საქართველოს სახელმწიფოებრიობის და დამოუკიდებლობის მოუსვენარი მტერი, ვინ ებრძოდა 19-ე საუკუნიდან დაწყებული ქართულ ენას, ვინ ებრძოდა გამუდმებით ქართულ ეკლესიას და სარწმუნოებას, ვინ ებრძოდა საქართველოს დამოუკიდებლობის ყოველივე მცდელობას."

პრეზიდენტმა ჯარს ასევე მიმართა, რომ ქვეყანა ახლა გზაგასაყარზეა და ყველაზე ეგზისტენციალური არჩევანი უნდა გააკეთოს — "იყოს, ან არ იყოს, რამეთუ თავისუფლების გარეშე ყოფნა, არსებობა არაა." ხოლო ვინც თესავს დაპირისპირებას და პროვოკაციას, ის საკუთარი ჯარისა და სამშობლოს წინააღმდეგაც არის.

სალომე ზურაბიშვილს დღევანდელ სიტყვას წინ უძღოდა პარტია ქართული ოცნების საპატიო თავმჯდომარის, ბიძინა ივანიშვილის გუშინდელი საჯარო გამოსვლა ხელისუფლების მიერ ორგანიზებულ შეკრებაზე რუსული კანონპროექტის მხარდასაჭერად. ივანიშვილმა ღიად ანტიდასავლური განცხადებები გააკეთა და თავისი სიტყვით გამოსვლისას კონსპირაციული თეორიები გაავრცელა.

გაიგე მეტი: ივანიშვილის მიმართვა ანტიდასავლური აქცენტებითა და კონსპირაციული თეორიებით