თუ ჰორორის ჟანრი გიყვართ, განსაკუთრებით კი ზომბი აპოკალიფსზე შექმნილი ფილმები, მაშინ აუცილებლად გეცოდინებათ ჯორჯ რომეროს სახელი და გვარი.

Night of the Living Dead-ისა და სხვა ცნობილი საშინელებათა ფილმების რეჟისორი გასულ ღამეს, 77 წლის ასაკში, ფილტვების სიმსივნესთან ხანგრძლივი ბრძოლის შედეგად გარდაიცვალა.

მიუხედავად იმისა, რომ რომეროს ფილმები მაყურებელში დიდი პოპულარობით სარგებლობდა, ის საკუთარ თავს არასდროს ეძახდა ე.წ. ჰოლივუდის ფიგურას. ამის მიზეზი შეიძლება ისიც იყოს, რომ რეჟისორს არასდროს იწვევდნენ ვარსკვლავურ ღონისძიებებსა თუ სხვა დაჯილდოებებზე.

ჯორჯ რომეროს სარეჟისორი ნამუშევრები გამოირჩევა იმითაც, რომ იყო ერთ-ერთი პირველი, ვინც ძლიერი ქალი პერსონაჟები შემოიყვანა საკუთარ ფილმში.

ერთ-ერთ ბოლო ინტერვიუში მან ჰორორის ჟანრზე ისაუბრა.

"თუ შენი საშინელებათა ჟანრის ფილმი წარმატებული გამოდგა, შემდეგ ყველა ამბობს - ოჰ, მოდით ჩვენც გადავიღოთ ჰორორი. სწორედ ეს არის ის, რაც დაეხმარება ამ ჟანრს რომ არ მოკვდეს. მე ჩემს ზომბებს ვგავარ, არასდროს მოვკვდები", ამბობდა რეჟისორი.

55 წლიანი კარიერის განმავლობაში რეჟისორმა 20 ფილმი გადაიღო, საბოლოო ჯამში კი კინოს ისტორიაში შევიდა, როგორც ჰორორის ჟანრის პიონერი და "ზომბი ფილმების მამა", რომელზე მუშაობაც რეჟისორმა ჯერ კიდევ გასული საუკუნის 60-იან წლებში დაიწყო.