მოკლედ: რამდენიმე დღეა, ჭიათურელი მაღაროელები პროტესტის ნიშნად, სამუშაოს შესრულებაზე უარს ამბობენ.

  • მოთხოვნა დარკვეთის მაღაროში, 12-საათიან სამუშაო გრაფიკზე, ე.წ. ვახტურ რეჟიმზე გადასვლა და შესაბამისი ანაზღაურების მიღებაა.
  • ვახტური რეჟიმი ზედიზედ 15 დღის (ან ღამის) განმავლობაში 12-საათიან ცვლაში, ოფიციალური შესვენების გარეშე მუშაობას გულისხმობს.

დეტალები: დარკვეთის მაღაროში გაფიცული მეშახტეების სურვილია 7-საათიანი სამუშაო გრაფიკიდან 12-საათიან სამუშაო გრაფიკზე გადასვლა.

  • ისინი ამბობენ, რომ ამის დაპირება ჯორჯიან მანგანეზისგან ჯერ კიდევ ხუთი თვის წინ მიიღეს. თუმცა, პირობა დღემდე არ შესრულებულა.
  • მაღაროელების თქმით, დამსაქმებელი თანახმაა, დარკვეთის მაღარო 12-საათიან სამუშაო გრაფიკზე გადავიდეს, მაგრამ შესაბამისი ხელფასის გადახდაზე უარს ამბობს.
  • "ეს მაღაროს თანამშრომლებისთვის არის კატეგორიულად მიუღებელი. არ შეიძლება იზრდებოდეს სამუშაო დრო და არ იზრდებოდეს ანაზღაურება", — ამბობს ერთ-ერთი მაღაროელი, ტარიელ მიქაცაძე.
  • ისინი განმარტავენ იმასაც, თუ რატომ უნდათ ვახტურ რეჟიმზე გადასვლა:
  • "იმიტომ არის 12-საათიან გრაფიკზე გადასვლა კარგი, რომ არ მოუწევთ ადამიანებს იმუშაონ დიზელის მზიდავებთან ერთად და ისუნთქონ დიზელის გამონაბოლქვი, რაც კიდევ უფრო აზიანებს მათ ჯანმრთელობას".

ამ დროისთვის, სამუშაოები გაჩერებულია ჭიათურის 13 მაღაროში — დარკვეთის მაღაროში მომუშავეებს სოლიდარობას უცხადებენ სხვა მაღაროელებიც, რომლებიც უკვე ვახტური რეჟიმით მუშაობენ.

  • ტარიელ მიქაცაძე, რომელიც ერთ-ერთია გაფიცულთაგან, ამბობს, რომ ყველაფერი კომპანიასა და მათ სწორ გადაწყვეტილებაზეა დამოკიდებული.
  • მორიგი მოლაპარაკება მაღაროელებსა და ჯორჯიან მანგანეზს შორის სამშაბათს, 5 დეკემბერს გაიმართება.

რას ამბობს დამსაქმებელი: On.ge კომენტარისთვის ჯორჯიან მანგანეზს დაუკავშირდა.

  • კომპანიაში ამბობენ, რომ მოლაპარაკებებს აწარმოებენ და მოსაფიქრებლად დრო ითხოვეს, რადგან, ამ ეტაპზე, "ჭიათურის საწარმოებში ძალიან ცუდი ფინანსური მდგომარეობაა."

არქივიდან: ივნისში, ჭიათურელი მაღაროელები გაფიცულები იყვნენ და ღირსეულ ანაზღაურებასა და შრომის პირობების გაუმჯობესებას ითხოვდნენ.

  • პროტესტის ნიშნად მაღაროელების ნაწილმა შიმშილობა გამოაცხადა, ზოგიერთმა მათგანმა კი პირი ამოიკერა.