მოკლედ: აშშ-ის პრეზიდენტი, ჯოზეფ ბაიდენი ისრაელში ჩავა.

  • ჯო ბაიდენს თელ-ავივში ხვალ, 18 ოქტომბერს ელოდებიან.
  • აშშ-ის სახელმწიფო მდივნის, ენტონი ბლინკენის თქმით, ბაიდენის ვიზიტი კიდევ ერთხელ დაადასტურებს ისრაელისადმი მხარდაჭერას.

რატომ არის მნიშვნელოვანი: ენტონი ბლინკენი ამბობს, რომ აშშ-ის პრეზიდენტი შეეცდება,

  • დაეხმაროს ისრაელს ტყვეების გათავისუფლების საკითხში;
  • იზრუნებს ღაზის სექტორში ჰუმანიტარული ტვირთის შეტანა მოხერხდეს ისე, რომ ამით ჰამასმა არ ისარგებლოს.
  • აშშ-ის პრეზიდენტი, ასევე, ესტუმრება იორდანიას, სადაც მეფე აბდულა მეორეს, ეგვიპტის პრეზიდენტს და პალესტინის პრეზიდენტს მაჰმუდ აბასს შეხვდება.


სტრიქონებს შორის: ისრაელისადმი მხარდაჭერის გამოხატვის გარდა, ბაიდენის სტუმრობა იქნება ერთგვარი გაფრთხილება რეგიონისთვის, კონკრეტულად — ირანისა და ჰეზბოლისთვის, კონფლიქტში სამომავლო შესაძლო ჩართვასთან დაკავშირებით.

პრობლემურია, რომ: ამ დროისთვის, ჯერ ისევ უცნობია, არის თუ არა სიახლე რაფას გამშვები პუნქტის გახსნასთან დაკავშირებით, რომელიც ისრაელის მიერ არაკონტროლირებადი ერთადერთი გამშვები პუნქტია ღაზის სექტორის სასაზღვრო ზოლზე, რომელიც მას ეგვიპტესთან აკავშირებს.

რამდენად უსაფრთხოა ბაიდენისთვის ისრაელში ვიზიტი?

  • დიპლომატიური ვიზიტების დროს საფრთხის რისკები ძალიან მაღალია — ამისი ნათელი ილუსტრირება იყო ორშაბათს, 16 ოქტომბერს, ბლინკენისა და ნეთანიაჰუს შეხვედრა, როდესაც საჰაერო განგაშის სიგნალი ჩაირთო და მაღალჩინოსნები იძულებულები გახდნენ, თავშესაფარში გადასულიყვნენ.