რა მოხდა: მოქალაქე სოფო გოგსაძემ დაწერა, რომ 2 ივნისს ბარნოვზე ტაქსის მძღოლმა მანქანა გააჩერა და მიაძახა: "რამხელა ბაყვები გაქვს".

  • მან მანქანის ნომრის ჩაწერა მოასწრო და მეგობრის რჩებით, პოლიციაში განცხადება მიიტანა.
  • როგორც ის წერს, ამ ხნის მანძილზე პოლიციის განყოფილებაში მისვლა რამდენჯერმე მოუწია, სასამართლო კი 29 ივნისს გაიმართა.

დეტალები: სოფო გოგსაძე ჰყვება, რომ სასამართლოზე ჩვენების მიცემის შემდეგ, ტაქსის მძღოლს კითხვის დასმის საშუალება მისცეს, ის კი "წამოდგა და კაბის ზომის და სიგრძის შემოწმება" დაიწყო — ასევე, ცდილობდა ფაქტის უარყოფასაც.

  • საბოლოოდ, ტაქსის მძღოლს ადმინისტრაციული სამართალდარღვევა დაუმტკიცდა და ჯარიმა დაეკისრა.
  • რადიო თავისუფლების ცნობით, გადაწყვეტილება მოსამართლე ნინო შჩერბაკოვმა მიიღო.
  • გამოცემის ინფორმაციითვე, სასამართლომ ტაქსის მძღოლი სამართალდამრღვევად ადმინისტრაციული კოდექსის 166-ე მუხლის პრიმა პირველი ნაწილით ცნო.
  • ეს საზოგადოებრივ ადგილებში პირის მიმართ არასასურველი სექსუალური ხასიათის ქცევას გულისხმობს, რომელიც მიზნად ისახავს ან/და იწვევს მისი ღირსების შელახვას და ქმნის მისთვის დამაშინებელ, მტრულ, დამამცირებელ, ღირსების შემლახველ და შეურაცხმყოფელ გარემოს.