კლუბ Backstage 76-ში ჯგუფ Kairmorkhen-ის ახალი მუსიკალური კლიპის პრემიერა გაიმართა. სიმღერა "ჩემს მეზობელს აქვს ბომბი" (У соседа бомба), 2009 წელს შეიქმნა და პოლიტიკური სარკაზმის ჟანრშია შესრულებული.

ჯგუფ Kairmorkhen-ის სტილისტიკა განისაზღვრა, როგორც "ჰორორ პანკის" (Horror Punk Rock) მიმდინარეობა. მუსიკოსებმა 2005 წელს ჩაწერეს დემო ალბომი „ძველი თეატრი” (Старый Театр), რომელშიც შესულია 10 სიმღერა.

სიმღერაზე, „ჩემს მეზობელს აქვს ბომბი”, გადაღებული კლიპის რეჟისორი ალექსანდრე მელიკოვია.

„სიმღერა შესრულებულია პოლიტიკური სარკაზმის სტილში. გადავწყვიტეთ, ვიდეორგოლიც სარკასტული და მხიარული ყოფილიყო, რომ გადმოეცა სიმღერის ხასიათი. ვიდეო გადავიღეთ ნულოვანი ბიუჯეტით. ამიტომ, გადაღება არც ისე მარტივი იყო. გვაინტერესებდა, მხოლოდ ენთუზიაზმით რამდენად შორს წავიდოდით და რა გამოგვივიდოდა. ამავდროულად, გადაღებების პროცესი ძალიან სასიამოვნო და ჩვენთვის სახალისო იყო”, - ამბობს რეჟისორი.

კლიპის პრემიერის შემდეგ, ლაივ კონცერტი გაიმართა, რომელშიც, მასპინძელი ჯგუფის გარდა, The Georgians და Dogweather მონაწილეობდნენ.

ჯგუფის არსებობის მანძილზე, Kairmorkhen-ის წევრებმა 50-ზე მეტი კომპოზიცია შექმნეს და 200-ზე მეტი ლაივ კონცერტი ჩაატარეს.