არსებული ინფორმაციით, აშშ-ში გაემგზავრნენ მოსამართლეები ეკა არეშიძე, ნინო ელიეშვილი, ლევან დარბაიძე და თამარ ჩიხლაძე. პოსტი სოციალურ ქსელში ეკა არეშიძემ გამოაქვეყნა.

რატომ არის მნიშვნელოვანი: არსებული ინფორმაციით, იმ მოსამართლეებიდან, რომელთა ვიზიტიც აშშ-ში თავდაპირველად იგეგმებოდა, მხოლოდ ნინო ელიეშვილი გაემგზავრა.

• ოთხმა მათგანმა კი უარი თქვა, მას შემდეგ, რაც 5 აპრილს აშშ-ის სახელმწიფო დეპარტამენტმა ლევან მურუსიძე, მიხეილ ჩინჩალაძე, ირაკლი შენგელია და ვალერიან ცერცვაძე დაასანქცირა.
• მათ შორის იყო ბადრი კოჭლამაზიშვილი, რომელმაც თქვა, რომ აშშ-ში ვიზიტმა პოლიტიკური ელფერი შეიძინა, რის გამოც იქ გამგზავრებაზე უარს ამბობს.

დეტალები: მოსამართლეთა ნაწილის აშშ-ში სასწავლო პროგრამით წასვლას გამოეხმაურა იუსტიციის უმაღლესი საბჭოს ყოფილი წევრი ნაზი ჯანეზაშვილი.

• მისი თქმით, 5-დან 4 მოსამართლის უარმა, წასულიყვნენ აშშ-ში, ამ კონტექსტში, დატოვა განცდა, რომ ეს იყო არა დამოუკიდებელი გადაწყვეტილება, არამედ ზემოქმედების შედეგი.
• "ამჟამად სასწავლო ვიზიტით აშშ-ში იმყოფება რამდენიმე მოსამართლე. მათ შორისაა ქალბატონი ნინო ელიეშვილი. როგორც ჩანს, ის არ დაემორჩილა კლანურ წესებს და ფსევდო სოლიდარობის აქტში არ მიიღო მონაწილეობა";
• "გარდა ამისა, პატივისცემას იმსახურებენ ის მოსამართლეები, რომლებმაც 4 მოსამართლის უარის შემდეგ დათანხმდნენ ვიზიტს. მოსამართლეების ეს გადაწყვეტილება მათ მედეგობაზე მიუთითებს. განსაკუთრებით ახლა, მოსამართლეების მიმართ ხელისუფლების ამ ინტენსიური განცხადებებისა და საპარლამენტო უმრავლესობის ე.წ. პოლიტიკური სოლიდარობის ფონზე";

ნაზი ჯანეზაშვილი წერს, რომ უცნაურია, მაგრამ მოსამართლისთვის ღირსების საკითხი გახდა სასწავლო პროგრამაში მონაწილეობაზე დამოუკიდებლად გადაწყვეტილების მიღებაც კი.

• "დაახლოებით 1 წლის წინ ირაკლი კობახიძემ საქართველოს პარლამენტიდან მიმართა მოსამართლეებს და სოლიდარობისკენ მოუწოდა: "საქართველოში კარგად იციან ღირსებისა და კოლეგიალობის ფასი და დარწმუნებული ვარ, კოლეგა მოსამართლის დისკრიმინაციის ფონზე, ამერიკაში წასვლას არცერთი სხვა მოსამართლე აღარ იკადრებდა"";
• "მაშინ მისი განცხადება ეხებოდა ნიკა გვარამიას საქმის მოსამართლეს, ლაშა ჩხიკვაძეს. ირაკლი კობახიძის ამ განცხადებას მოჰყვა შედეგი, პროგრამაში მიწვეულმა მოსამართლეებმა უარი თქვეს აშშ-ში სასწავლო ვიზიტში მონაწილეობაზე";
• "კიდევ ერთხელ აღვნიშნავ, რომ ძალიან მნიშვნელოვან საქმეს აკეთებს აშშ, რომ მოსამართლეებს ასეთი გამოცდილების მიღების საშუალებას აძლევს", — წერს ის.