ახალგაზრდა იურისტთა ასოციაცია მიიჩნევს, რომ შესაძლოა, იკვეთებოდეს ბრალდებულის უფლებების დარღვევის შემთხვევები. ორგანიზაცია მოუწოდებს სპეციალურ საგამოძიებო სამსახურს და სახალხო დამცველს, იმოქმედონ თავიანთი მანდატის შესაბამისად.

რატომ არის მნიშვნელოვანი: რუსული კანონის საწინააღმდეგო აქციის მონაწილე, 21 წლის ლაზარე გრიგორიადისი პოლიციამ 29 მარტს დააკავა, 31 მარტს კი სასამართლომ აღკვეთის ღონისძიების სახით პატიმრობა შეუფარდა.

• გამოძიების ვერსიით, გრიგორიადისმა პოლიციის თანამშრომლებს ქვები და ე.წ. მოლოტოვის კოქტეილები ესროლა, ასევე, ცეცხლი წაუკიდა შსს-ის კუთვნილ ავტომობილს.
• ადვოკატი ამბობს, რომ გრიგორიადისს აღიარებითი ჩვენება მეგობრის დაკავების მუქარით მიაცემინეს.
• ის ამ დროისთვის დუმილის უფლებას იყენებს — როგორც ადვოკატი აღნიშნავს, ჩვენებას შემდეგ სასამართლო პროცესზე მისცემს.

დეტალები: ორგანიზაციას მიაჩნია, რომ გრიგორიადისის მიმართ განვითარებული მოვლენები, მის მიერ სამართლიანი სასამართლოს უფლებით სარგებლობას მნიშვნელოვნად შეზღუდავს.

• საიას განცხადებით, საქმეზე გამოიკვეთა რამდენიმე დარღვევა, მათ შორის:
• სასამართლომ საჯაროდ არ დაასაბუთა აღმკვეთი ღონისძიების სახით გამოყენებული პატიმრობა;
• მაღალი თანამდებობის პირების მიერ გავრცელებულმა განცხადებებმა შესაძლოა ლაზარე გრიგორიადისის სამართლიანი სასამართლოს უფლებაზე უარყოფითად იმოქმედოს. ეს, რიგ შემთხვევაში, ამავდროულად, არღვევს ლაზარე გრიგორიადისის უდანაშაულობის პრეზუმპციას;
• თვითინკრიმინაციის პრივილეგიის შესაძლო დარღვევა;
• არასათანადო მოპყრობის აკრძალვის შესაძლო დარღვევა.

საია ამოუწოდებს ხელისუფლების წარმომადგენლებს თავი შეიკავონ დისკრიმინაციული განცხადებებისგან და ლაზარე გრიგორიადისის ბრალდების საქმეზე არ გასცდნენ უდანაშაულობის პრეზუმციის ფარგლებს.

• სპეციალურ პენიტენციურ სამსახურს — ეროვნული კანონმდებლობისა და სახელმწიფოს საერთაშორისო ვალდებულებებთან სრული შესაბამისობით დაიცვას პატიმრის უფლებები;
• სპეციალურ საგამოძიებო სამსახურს — ლაზარე გრიგორიადისის ადვოკატის მიერ გაჟღერებული ინფორმაციის საფუძველზე დაიწყოს გამოძიება იძულებით თმის გადაპარსვის ეპიზოდზე.
• საქართველოს სახალხო დამცველს — იმოქმედოს მისი მანდატით გათვალისწინებული მექანიზმებით და, მათ შორის, განახორციელოს ხშირი მონიტორინგი პატიმარ ლაზარე გრიგორიადისის უფლებრივ მდგომარეობაზე.

ლაზარე გრიგორიადისის დაკავების შემდეგ მის წინააღმდეგ ქართულმა ოცნებამ მადესკრედიტირებელი და პროპაგანდისტული კამპანია წამოიწყო.

• მმართველი გუნდის თავმჯდომარემ გრიგორიადისს "გზას აცდენილი კაცი" უწოდა და თქვა, რომ "ჩანს, ყველანაირი ორიენტაცია არეული აქვს" — კობახიძის ამ განცხადებას, სავარაუდოდ, ჰომოფობიური ქვეტექსტი ჰქონდა.
• ომბუდსმენის თქმით, ნებისმიერი განცხადება, რომელიც ადამიანის ორიენტაციასთანაა დაკავშირებული, მიუღებელია.
• სახალხო დამცველი აღნიშნავს, რომ საკუთარი მანდატის ფარგლებში ომბუდსმენის აპარატი აკეთებს ყველაფერს, რათა გრიგორიადისის უფლებები იყოს უზრუნველყოფილი.