საქსტატის ინფორმაციით, სამომხმარებლო ფასები თებერვალში გასული წლის ანალოგიურ პერიოდთან შედარებით 8,1%-ით გაიზარდა.

რატომ არის მნიშვნელოვანი: ინფლაცია მოსახლეობის ერთ-ერთი მთავარი ეკონომიკური პრობლემაა.

  • ის ადამიანთა ხარჯებს ზრდის და თუ შემოსავალი უფრო სწრაფად არ იზრდება ისინი რეალურად ღარიბდებიან.

  • ფასების ზრდა განსაკუთრებით სოციალურად დაუცველებზე მოქმედებს.

დეტალები: საბაზო ინფლაციის მაჩვენებელმა 2023 წლის თებერვალში, გასული წლის შესაბამის პერიოდთან შედარებით 6,5% შეადგინა, ხოლო თამბაქოს გარეშე წლიური საბაზო ინფლაციის მაჩვენებელი 6.6%-ით განისაზღვრა.

  • წლიური ინფლაციის მაჩვენებლის ფორმირებაზე ძირითადი გავლენა იქონია ფასების ცვლილებამ შემდეგ ჯგუფებზე:
  • სურსათი და უალკოჰოლო სასმელები — ფასები გაიზარდა 14%-ით;
  • საცხოვრებელი, წყალი, ელ.ენერგია, აირი — დაფიქსირდა ფასების 12,4%-იანი მატება.
  • ჯანმრთელობის დაცვის ჯგუფში ფასები შემცირდა 7,6%-ით.

სურსათის ჯგუფში ფასები მომატებულია შემდეგ ქვეჯგუფებზე:

  • ბოსტნეული და ბაღჩეული — 25,8%;
  • პური და პურპროდუქტები — 21%;
  • რძე, ყველი და კვერცხი — 17,2%;
  • ყავა, ჩაი და კაკაო — 14,5%;
  • მინერალური და წყაროს წყალი, უალკოჰოლო სასმელები და ნატურალური წვენები — 12,2%;
  • თევზეული — 12,1%.