ასე ეხმაურება საოჯახო მარანი ოდა პარლამენტში დაინიცირებულ კანონპროექტს "უცხოური გავლენის აგენტების" შესახებ.

რატომ არის მნიშვნელოვანი: პარლამენტში დღეს, 2 მარტს რუსული კანონის ორი პროექტის განხილვა იწყება — უმრავლესობა აპირებს, პირველი მოსმენით ორივე კანონი მიიღოს და შემდეგ ვენეციის კომისიაში გაგზავნოს.

• კანონპროექტები ქართული ოცნებიდან ფორმალურად წასულმა ანტიდასავლურმა მოძრაობამ შეიმუშავა.
• მსგავსი კანონი მოქმედებს რუსეთში — ქართველი დეპუტატების მსგავსად, ოკუპანტი ქვეყნის საკანონმდებლო ორგანო მის მიღებას მოქალაქეების ინტერესების, ქვეყნის უსაფრთხოებისა და სუვერენიტეტის "უცხოური გავლენებისგან" დაცვის მოტივით ხსნიდა, საბოლოოდ, კი კრემლმა მედიების, ორგანიზაციებისა და თავისუფალი სიტყვის წინააღმდეგ გამოიყენა.
• გასულ წელს ადამიანის უფლებათა ევროპულმა სასამართლომ დაადგინა, რომ ეს რუსული კანონი ადამიანის უფლებებს არღვევს.

დეტალები: მარანი ოდას განცხადებით, რუსული კანონი მათი არჩევანი არ არის.

• "რუსული კანონი მათი არჩევანია, ვისაც საქართველოში მცირე და საშუალო ბიზნესის გაძლიერება, შესაბამისად, ეკონომიკურად დამოუკიდებელი, ძლიერი, თავისუფალი მოქალაქეების არსებობა აშინებს".
• "ღვინის დაყენება 200 ბოთლიდან დავიწყეთ. მარტვილში გადმოსვლისას არანაირი რესურსი არ გვქონდა, რომ წარმოება გაგვეფართოებინა და ჩვენი ღვინოების მიმართ არსებული მზარდი მოთხოვნისთვის გვეპასუხა";
• "რომ არა USAID-ის პროგრამა — Zrda Activity in Georgia, გაეროს ქალთა ფონდის ქალთა ეკონომიკური გაძლიერების პროგრამა და სახელმწიფო პროგრამა — აწარმოე საქართველოსთვის (რომელიც კვლავ საერთაშორისო დონორების ფინანსური მხარდაჭერით მოქმედებს), საოჯახო მარანი "ოდა" თავისი მწირი რესურსებით ვერ შეძლებდა ღვინის წარმოების გაფართოებას და ვერც ქართულ, ქვევრის ღვინოს გააცნობდა 4 კონტინენტზე მსოფლიოს 12 ქვეყანას".

"უცხოური გავლენის აგენტებზე" კანონპროექტი გააკრიტიკა არაერთმა ექსპერტმა, ადგილობრივმა და საერთაშორისო ორგანიზაციამ.

• გუშინ, პირველ მარტს ელჩები ამ თემასთან დაკავშირებით პაპუაშვილს შეხვდნენ — ევროკავშირის ელჩმა, პაველ ჰერჩინსკმა თქვა, რომ არ იყო მარტივი დისკუსია.
• "ძალიან მკაფიოდ დავაფიქსირეთ, რომ ეს ინიციატივა არ არის თავსებადი ევროკავშირის ღირებულებებთან და კიდევ ერთხელ გავიმეორეთ, რომ ეს ინიციატივა არის წინააღმდეგობაში, როგორც მინიმუმ, ორ რეკომენდაციასთან 12-დან", — თქვა ჰერჩინსკიმ.

ხალხის ძალაში ცდილობენ დაამტკიცონ, თითქოს მათი პროექტი არა რუსული, არამედ უნგრული და ამერიკული კანონიდანაა აღებული, თუმცა ასე არ არის.

• სენატორმა ჯინ შაჰინმა განაცხადა, რომ ის არ არის აშშ-ში არსებული კანონის მსგავსი, რაც შეეხება უნგრულ კანონს OSCE/ODIHR, ევროპის საბჭოს ადამიანის უფლებათა კომისარმა, ვენეციის კომისიამ და გაერომ ის უარყოფითად შეაფასა.
• ამ განმარტებების, მოწოდებებისა და მიმართვების ფონზე, კანონპროექტზე გამიჯვნის ნაცვლად, მმართველ გუნდში აცხადებენ, რომ მას მხარს დაუჭერენ.