კომპანია გაფიცული თანამშრომლების ქმედებებს პროვოკაციას უწოდებს.

რატომ არის მნიშვნელოვანი: 13 იანვარს საირმე მინერალ ვოთერსის თანამშრომლები გაიფიცნენ.

  • ისინი ღირსეულ სამუშაო პირობებსა და სამართლიან ანაზღაურებას ითხოვენ.
  • დასაქმებულთა თქმით, გაფიცვამდე 21-დღიანმა მედიაციის პროცესმა უშედეგოდ ჩაიარა.
  • ამბობენ, რომ გაფიცვა უვადოა და გაგრძელდება მანამ, სანამ მოთხოვნები არ დაკმაყოფილდება.

დეტალები: შპს საირმის განცხადებით, გაფიცულები და პროფკავშირის წარმომადგენელი, გიორგი დიასამიძე დეზინფორმაციას ავრცელებენ და კანონსაწინააღმდეგოდ მოქმედებენ.

  • "არის მუქარის, დაშინების, შანტაჟის ფაქტები. ასევე, კეტავენ გზებს, რაც ხელს უშლის პროდუქციის ტრანსპორტირებას. გრძელდება გიორგი დიასამიძისა და მისი ზეგავლენის ქვეშ მოქცეული გაფიცული თანამშრომლების მხრიდან ცილისმწამებლური ინფორმაციის გავრცელება, რომელიც პირდაპირ მიმართული არის კომპანიის დისკრედიტაციისაკენ. აღნიშნულიდან გამომდინარე, კომპანია გეგმავს იმიჯისა და რეპუტაციის შელახვისგან დაცვის მიზნით სასამართლოს მიმართოს", — ამბობენ საირმეში.
  • მათივე თქმით, კომპანიის შეთავაზებები ქარხანაში დასაქმებულებმა დაიწუნეს და მოთხოვნები რამდენჯერმე შეცვალეს.