ამის შესახებ სალომე ზურაბიშვილმა განცხადება გაავრცელა.

რატომ არის მნიშვნელოვანი: პრეზიდენტი ამბობს, რომ კანონში ცვლილებებს ვეტოს იმიტომ ადებს, რომ "არც საჭირო, არც საჩქარო და არც არგუმენტირებულია".

  • განმარტავს, რომ მუშაობს პარლამენტისთვის ეროვნული ბანკის საბჭოს ორი წევრის კანდიდატურის წარსადგენად.
  • მისი განცხადებით, ამ პროცესის პარალელურად, პარლამენტმა მიიღო საკანონმდებლო ცვლილებები — ამატებს ერთ თანამდებობას, პირველი ვიცე-პრეზიდენტის სახით.
  • რომელიც გახდება ეროვნული ბანკის პრეზიდენტის მოვალეობის შემსრულებელი, მანამ სანამ საქართველოს პრეზიდენტი არ დანიშნავს სების ახალ ხელმძღვანელს.

დეტალები: ზურაბიშვილის თქმით, დამატებითი ვიცე-პრეზიდენტის თანამდებობა საჭირო არაა, რადგან მოქმედი 3 ვიცე-პრეზიდენტიდან შესაძლებელია ერთ-ერთმა შეასრულოს პრეზიდენტის მოვალეობა, ამას პრაქტიკა ადასტურებს.

  • "მაშასადამე, ჩნდება კითხვა: ნუთუ ხელისუფლებას არცერთი ვიცე პრეზიდენტის კანდიდატურა არ აკმაყოფილებს და სჭირდება დამატებითი ადგილის შექმნა?", — წერია განცხადებაში.
  • მისივე განმარტებით, ჩნდება ეჭვი, რომ თუ საქართველოს პრეზიდენტის წარდგენილ კანდიდატურებს არ ექნება პარლამენტის მხარდაჭერა, კანონი იძლევა შესაძლებლობას, რომ პირველმა ვიცე-პრეზიდენტმა განუსაზღვრელი ვადით შეასრულოს ეროვნული ბანკის პრეზიდენტის მოვალეობა.
  • ამბობს, რომ ასეთი ეჭვი უნდა გაიფანტოს, წინააღმდეგ შემთხვევაში, შესაძლოა, ეროვნული ბანკის დამოუკიდებლობის პრინციპი კითხვის ნიშნის ქვეშ დადგეს.
  • "ამდენად, საქართველოს პრეზიდენტი, ქვეყნის ინტერესებიდან გამომდინარე, იმედს იტოვებს, რომ ვეტო არ დაიძლევა და მის მიერ შეთავაზებული მოტივირებული შენიშვნები იქნება გათვალისწინებული", — ნათქვამია განცხადებაში.